ბათუმში მშენებარე კორპუსში ლიფტის ჩავარდნის ფაქტს შრომის ინსპექცია იკვლევს

ბათუმში, მშენებარე კორპუსში დამონტაჟებული სატვირთო ლიფტის ჩავარდნის ფაქტზე, საქართველოს ჯანდაცვის სამინისტროს შრომის ინსპექტირების დეპარტამენტმა მოკვლევა დაიწყო.

„შეტყობინების შესვლისთანავე შრომის ინსპექციის სამუშაო ჯგუფი შემთხვევის შესასწავლად გაემართა. მიმდინარეობს მოკვლევის პროცედურები, რომლის დასრულების შემდეგაც დადგინდება შრომის უსაფრთხოების რა კონკრეტული ნორმები დაირღვა ობიექტზე. აღნიშნული ობიექტი აქამდე არ იყო შემოწმებული შერჩევითი კონტროლის საფუძველზე“, - განმარტავენ  ჯანდაცვის სამინისტროს შრომის ინსპექტირების დეპარტამენტში. 

ქვეყნის მასშტაბით ინსპექტირების შედეგად 60 მშენებლობა შეჩერდა. ობიექტები სპეციალური დადგენილებით შემდეგი კრიტერიუმების მიხედვით შეირჩა: მშენებლობები, სადაც ბოლო სამი წლის განმავლობაში მოხდა უბედური შემთხვევა, არსებობს პროფესიული დაავადების გაჩენის ან განვითარების რისკი და მესამე, სადაც დარღვეულია შრომის უსაფრთხოების ნორმები.

შემთხვევის შედეგად დაშავდა 3 ადამიანი, მათი მდგომარეობა სტაბილურია. გამოძიება სამთო, სამშენებლო ან სხვა სამუშაოს წარმოებისას უსაფრთხოების წესის დარღვევის მუხლით მიმდინარეობს.

ბათუმში, აღმაშენებლის ქუჩაზე, მშენებარე კორპუსს ლიფტი მოწყდა, რომელშიც ოთხი ადამიანი იმყოფებოდა. Imedinews-ის ინფორმაციით, ლიფტში ორი მუშა, 2 კი ბინის დასათვალიერებლად მისული მოქალაქე იყო. 

მსგავსი შემთხვევა ბათუმში 23 ივნისსაც მოხდა. კობალაძის ქუჩის 15 ნომერში მდებარე 22-სართულიან საცხოვრებელ სახლში სატვირთო ლიფტი მესამე სართულიდან ჩაწყდა. ინციდენტის შედეგად რამდენიმე ადამიანმა დაჟეჟილობა მიიღო, ერთი კი დაშავდა.