თბილისში მიმდინარე საერთაშორისო კონფერენციაზე ინაშვილის გამოჩენას დაპირისპირება მოჰყვა. ვიდეო

თბილისში მიმდინარე საერთაშორისო კონფერენციაზე „პატრიოტთა ალიანსის“ გამოჩენას ხმაური მოჰყვა. ირმა ინაშვილი სიტყვით გამოსვლას მოითხოვდა. პოლიტიკოსს ნატოსთან დაკავშირებით პოზიციის დაფიქსირება სურდა, თუმცა მას დარბაზის დატოვება მოსთხოვეს. 

ინაშვილის განმარტებით, ის არ იყო მიწვეული კონფერენციაზე, თუმცა უფლება აქვს, დააფიქსიროს საკუთარი აზრი. 

კონფერენციას ნატოს ყოფილი გენერალური მდივანი ანდერს ფოგ რასმუსენი ესწრება. დღეს მან თქვა, რომ თუ ქართველები გადაწყვეტენ, ნატოს წესდების მეხუთე მუხლი ოკუპირებულ ტერიტორიებზე არ გავრცელდეს, ნატოს შეუძლია ამის მიღება და პროცესის დაწყება. 

„ახლა იმ წევრებისთვის, რომლებიც თავს იკავებენ, ადვილია თქმა, რომ საქართველოს აქვს გადაუწყვეტელი სასაზღვრო საკითხები რუსეთთან. ჩვენ არ შეგვიძლია საქართველოსთვის უსაფრთხოების გარანტიების მიცემა და მეხუთე მუხლის მთელ საქართველოზე გავრცელება. ვფიქრობ, პირველი ნაბიჯი ამ საკითხზე მსჯელობისთვის საქართველოში უნდა გადაიდგას და შემდეგ უნდა წავიდეს ნატო-ში. თუ თქვენ კითხულობთ ყოველწლიურ პროგრამებს, საქართველო თითქმის ყველა პირობას ასრულებს, მაგრამ ჯერ კიდევ გაქვთ პრობლემები საზღვრებთან დაკავშირებით. მაგრამ ამავე დროს, ჩვენ ვერ მივცემთ პუტინს ვეტოს უფლებას, ეს მან არ უნდა გადაწყვიტოს, შეუერთდება თუ არა საქართველო ნატო-ს. ეს საქართველოს მთავრობის და ნატო-ს საბჭოზეა დამოკიდებული“, - განაცხადა ნატო-ს ყოფილმა გენერალურმა მდივანმა.

50-ზე მეტ საერთაშორისო დელეგატს და 500-მდე სტუმარს უკვე მეორე დღეა, საქართველო, ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ საერთაშორისო კონფერენციაზე მასპინძლობს.

მას მაღალი რანგის დიპლომატები, საერთაშორისო ექსპერტები და საქართველოს მთავრობის წევრები ესწრებიან. ნატოს საკითხზე გამომსვლელებს შორისაა მაკკეინის ინსტიტუტის აღმასრულებელი დირექტორი კურტ ვოლკერიც.