პარლამენტში უზენაესის მოსამართლეობის კანდიდატების შესაბამისობის დამდგენი ჯგუფი შეიქმნა

საქართველოს პარლამენტის იურიდიულ კომიტეტში უზენაესი სასამართლოს მოსამართლეობის კანდიდატების საქართველოს კონსტიტუციისა და სხვა კანონის მოთხოვნებთან შესაბამისობის დადგენის მიზნით კომიტეტის სამუშაო ჯგუფი შეიქმნა. ამის შესახებ ინფორმაციას პარლამენტის პრესსამსახური ავრცელებს.

კომიტეტის თავმჯდომარის ანრი ოხანაშვილის თქმით, სამუშაო ჯგუფი 10 დღე იმუშავებს და "23 სექტემბერს დავიწყებთ თითოეული კანდიდატის ინდივიდუალურ მოსმენას, რაც ძალიან მნიშვნელოვანი პროცესია იურიდიულ საკითხთა კომიტეტში", - განაცხადა კენჭისყრის შემდეგ კომიტეტის თავმჯდომარემ, ანრი ოხანაშვილმა.

საკითხის განხილვის დაწყებამდე, ანრი ოხანაშვილმა საქართველოს უზენაესი სასამართლოს მოსამართლეობის კანდიდატების შერჩევის პროცესთან დაკავშირებით განცხადება გააკეთა.

"საქართველოს ისტორიაში, არასდროს ასე გამჭვირვალედ, ამ ინტენსივობითა და ამ ხანგრძლივობით არ მომხდარა უზენაესი სასამართლოს მოსამართლეობის კანდიდატებთან გასაუბრების წარმართვა. ეს არის მმართველი გუნდის მიერ შემუშავებული კანონის მონაპოვარი", - განაცხადა იურიდიულ საკითხთა კომიტეტის თავმჯდომარემ.

პარლამენტს უზენაესი სასამართლოს მოსამართლეობის კანდიდატთა სია 7 სექტემბერს წარედგინა. იუსტიციის უმაღლესმა საბჭომ პარლამენტში წარსადგენად უზენაესი სასამართლოს მოსამართლეობის 20 კანდიდატი შეარჩია.

უმაღლესმა საბჭომ უზენაესი სასამართლოს მოსამართლეობის მსურველ 50 კანდიდატთან გასაუბრება აგვისტოში დაასრულა.

საქართველოს პარლამენტში უზენაესი სასამართლოს მოსამართლეთა არჩევის პროცედურის შესახებ ვრცლად შეგიძლიათ ამ ბმულზე წაიკითხოთ.