„პატრიოტთა ალიანსი“ დევიდ კრამერის პერსონა ნონ გრატად გამოცხადებას ითხოვს

„პატრიოტთა ალიანსი“ ამერიკელი ექსპერტის დევიდ კრამერის „პერსონა ნონ გრატად“ გამოცხადებას ითხოვს. ამ მოთხოვნით პარტიის ახალგაზრდული ფრთის ორგანიზებით საგარეო საქმეთა სამინისტროსთან აქცია მიმდინარეობს. ცოტა ხნის წინ ისინი საგარეო საქმეთა სამინისტროში შეჭრას ცდილობდნენ. 

აქციის მონაწილის ბეჟან გუნავას თქმით, კრამერის საქციელი „ვერანაირ ჩარჩოებში ვერ ეტევა“. აქციის მონაწილეები საგარეუ უწყების ხელმძღვანელისგან შესაბამის შეფასებას მოითხოვენ. 

აქციის მონაწილეების თქმით, 15 სექტემბერს, 16:00 საათზე, ამერიკის საელჩოსთან ხალხმრავალი აქციის გამართვას აპირებენ.

10 სექტემბერს, ირმა ინაშვილი სასტუმრო „რუმსში“, საერთაშორისო კონფერენციაზე სიტყვით გამოსვლის მოთხოვნით გამოჩნდა, თუმცა ის ამ ღონისძიებაზე მიწვეული არ ყოფილა, რასაც ხმაური მოჰყვა. მოგვიანებით, პოლიტიკოსმა კონფერენციის მონაწილეებისადმი მიმართვა მაინც მოახერხა და ღონისძიების ამერიკელ სტუმრებს ჰკითხა, არის თუ არა ადამიანების წამება დასავლური ღირებულება. ინაშვილი დისკუსიის მონაწილეებისთვის იმის თქმას შეეცადა, რომ რასაც ბოკერია და სააკაშვილი „პატრიოტთა ალიანსზე“ ამბობენ, სიცრუეა და ისინი უცხოელ პარტნიორებზე მონოპოლიის შენარჩუნებას ცდილობენ. დევიდ კრამერმა კი განმარტა, რომ არ იცოდა, ვინ იყო ქალი, რომელიც ძალიან უხეშობდა და შლიდა კონფერენციას. იმის უარსაყოფად, რომ თითქოს კრამერი ინაშვილს არ იცნობდა, „პატრიოტთა ალიანსის“ ლიდერმა პრესკონფერენციაზე წარმოადგინა კრამერთან ერთად გადაღებული ფოტო, რომელიც მისი თქმით, ვაშინგტონში, 2010 წელს გამართულ შეხვედრაზეა გადაღებული.