ხაზარაძე: ივანიშვილმა ჩხარტიშვილის წინააღმდეგ შეტანილი სარჩელის გამოტანა მთხოვა

საზოგადოებრივი მოძრაობა „ლელოს“ დამფუძნებლის მამუკა ხაზარაძის განცხადებით, ბიძინა ივანიშვილმა მას საკონსტიტუციო სასამართლოში ბიზნესმენ ვანო ჩხარტიშვილის წინააღმდეგ შეტანილი სარჩელის გამოტანა სთხოვა. ამის შესახებ ხაზარაძემ ტელეკომპანია „პირველის“ გადაცემაში „რეაქცია“ განაცხადა.

„ვანო ჩხარტიშვილმა ჩვენი ბანკის წინააღმდეგ სამართლებრივი დავა დაიწყო და 30 მილიონ დოლარს ითხოვდა. ეს იყო აბსოლუტურად აბსურდული თემა და ჩვენ დავიწყეთ სამართლებრივი ბრძოლა. ავიყვანეთ იურისტები და აღმოვაჩინეთ, რომ მას ანალოგიური საქმეები აღძრული ჰქონდა სხვადასხვა მსხვილი კომპანიების მიმართ და ყველა ეს საქმე ხვდებოდა ერთ მოსამართლესთან, სადაც იმერული ხაჭაპურივით „ცხვებოდა“ და მისი მოგებით სრულდებოდა. ჩვენ მივხვდით, რომ მსგავს რიგში ვიდექით და საკონსტიტუციო სასამართლოს მივმართეთ სარჩელით“, - განაცხადა ხაზარაძემ.

მისივე თქმით, ამის შემდეგ მასსა და ივანიშვილს შორის სატელეფონო საუბარი შედგა.

„როდესაც გერმანიაში ვიყავი, დამირეკა ივანიშვილმა და დაახლოებით ერთი საათი მარწმუნებდა, რომ 3 დღეში საკონსტიტუციო სასამართლოში ამ საქმის გარჩევა არ მომხდარიყო. მე ვუთხარი, რომ ბანკის ერთ-ერთი აქციონერი ვარ და შეზღუდული ვარ. ივანიშვილთან ძალიან მეგობრული საუბრის შემდეგ მე დავურეკე უცხოელ პარტნიორებს და დავარწმუნე ისინი, რომ სარჩელი უნდა გამოგვეტანა. ამის შემდეგ მოხდა შეხვედრა სოლოლაკის სასახლეში, რომელსაც ვესწრებოდით მე, ბადრი ჯაფარიძე, ვანო ჩხარტიშვილი, ბიზნესმენი [სავარაუდოდ, გოჩა] ფიფია, არ ვიცი რატომ, და ბიძინა ივანიშვილი. გასაკვირი იყო ის, რომ შეხვედრას ესწრებოდა მაშინდელი გენერალური პროკურორი ირაკლი შოთაძეც. მე თბილისში  გავიზარდე, ბავშვობაში ყველას გვიჩხუბია, შემდეგ უფროსს დავუძახივართ და შევურიგებივართ, მაგრამ მილიციელი იმ შეხვედრებზე არავის მოუყვანია. მოვხვდი პატარა სასამართლოზე, სადაც ივანიშვილი იყო მოსამართლეც, უზენაესის თავმჯდომარეც და საკონსტიტუციოს თავმჯდომარეც. საათნახევრის განმავლობაში შოთაძე ჩუმად იჯდა და ბოლოს ჩაიჩურჩულა, რომ ამ საქმეში იურიდიულად არანაირი საფუძველი არ არსებობდა. ამიტომ როდესაც ივანიშვილი ამბობს, რომ ხაზარაძემ მადლობაც კი არ გადაიხადა, აქ ალბათ იმაზეა საუბარი, რომ რაღაც მაინც რატომ არ გადავუხადეთ ჩხარტიშვილს“, - განაცხადა ხაზარაძემ.

მამუკა ხაზარაძემ საზოგადოებრივი მოძრაობა „ლელოს“ პრეზენტაცია 12 სექტემბერს, ანაკლიაში გამართა. რაც შეეხება პარტიის დაფუძნებას, როგორც ხაზარაძემ ჟურნალისტებს უთხრა, ის და ბადრი ჯაფარიძე პარტიას ოქტომბერში დააფუძნებენ. 

„თიბისი“ ბანკის დამფუძნებლებს, მამუკა ხაზარაძეს და ბადრი ჯაფარიძეს 2019 წლის 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება. საქმე ეხება 2008 წლის ფინანსურ ოპერაციას.   

26 ივლისს სასამართლომ ბიზნესმენებს აღკვეთის ღონისძიების სახით თითოეულს 700 000 ლარიანი გირაო შეუფარდა (პროკურატურა მილიონიან გირაოს მოითხოვდა). ამავე დღეს ცნობილი გახდა, რომ „თიბისი ბანკის საქმეზე“ დაწყებული გამოძიების გამო, ბადრი ჯაფარიძემ და მამუკა ხაზარაძემ ანაკლიის მმართველი საბჭოს თავმჯდომარისა და თავმჯდომარის მოადგილის თანამდებობის დატოვების გადაწყვეტილებაც მიიღეს. მანამდე ისინი „თიბისი ბანკის“ მმართვასაც ჩამოშორდნენ.