ხაზარაძე: ეროვნული ბანკის პრეზიდენტი არის სამარცხვინო

საზოგადოებრივი მოძრაობა „ლელოს“ დამფუძნებელმა მამუკა ხაზარაძემ კობა გვენეტაძეს საქართველოს ეროვნული ბანკის სამარცხვინო პრეზიდენტი უწოდა. ამის შესახებ მან ტელეკომპანია „პირველის“ გადაცემაში „რეაქცია“ განაცხადა.

„ეროვნული ბანკის პრეზიდენტი არის სამარცხვინო. ჩვენ ეროვნული ბანკის ასეთი პრეზიდენტი არ გვყოლია, რომელმაც პრაქტიკულად არ იცის, როდის უნდა იყიდოს დოლარი. ის ყველაზე მაღალ ნიშნულზე ავსებს ქვეყნის რეზერვებს და ერთი სიტყვა არ უთქვამს მსოფლიოში აღიარებული [საბანკო] სისტემის დასაცავად“, - განაცხადა ხაზარაძემ.

მამუკა ხაზარაძემ საზოგადოებრივი მოძრაობა „ლელოს“ პრეზენტაცია 12 სექტემბერს, ანაკლიაში გამართა. რაც შეეხება პარტიის დაფუძნებას, როგორც ხაზარაძემ ჟურნალისტებს უთხრა, ის და ბადრი ჯაფარიძე პარტიას ოქტომბერში დააფუძნებენ.

„თიბისი“ ბანკის დამფუძნებლებს, მამუკა ხაზარაძეს და ბადრი ჯაფარიძეს 2019 წლის 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება. საქმე ეხება 2008 წლის ფინანსურ ოპერაციას. 

26 ივლისს სასამართლომ ბიზნესმენებს აღკვეთის ღონისძიების სახით თითოეულს 700 000 ლარიანი გირაო შეუფარდა (პროკურატურა მილიონიან გირაოს მოითხოვდა). ამავე დღეს ცნობილი გახდა, რომ „თიბისი ბანკის საქმეზე“  დაწყებული გამოძიების გამო, ბადრი ჯაფარიძემ და მამუკა ხაზარაძემ ანაკლიის მმართველი საბჭოს თავმჯდომარისა და თავმჯდომარის მოადგილის თანამდებობის დატოვების გადაწყვეტილებაც მიიღეს. მანამდე ისინი „თიბისი ბანკის“ მართვასაც ჩამოშორდნენ.

ხაზარაძემ სები-ს დღევანდელ ხელმძღვანელს „ეროვნული ბანკის სამარცხვინო პრეზიდენტი“ მანამდეც უწოდა. ხაზარაძის გარდა, გვენეტაძის კომპეტენტურობასა და მიუკერძოებლობაში ეჭვი ეპარებათ სფეროს სპეციალისტებსაც. მათი აზრით, ეროვნული ბანკის პრეზიდენტს უჭირს გაუმკლავდეს დამოუკიდებელი რეგულატორის ხელმძღვანელის როლს და მისი ზოგიერთი გადაწყვეტილება ნაკარნახევია პოლიტიკური კონიუნქტურით და არა საქართველოს საფინანსო მდგრადობის ინტერესით.

მას შემდეგ რაც ივლისის ბოლოს ლარის კურსი ისტორიულ მაჩვენებლამდე გაუფასურდა (1 დოლარის ფასი 3 ლარი გახდა) გვენეტაძის გადადგომის მოთხოვნით „ფეისბუკზე“ აქტიური კამპანია გაჩაღდა. 4 სექტემბერს კობა გვენეტაძემ ინფლაციის (ფასების ზრდა) ზრდაც აღიარა: აგვისტოში წლიურმა ინფლაციამ 4.9 პროცენტი შეადგინა, რაც მიზნობრივ მაჩვენებელს (3%-ს) 1.6 პროცენტული პუნქტით აჭარბებს. ეროვნული ბანკი პასუხისმგებელია როგორც ვალუტის კურსის სტაბილურობაზე (ლარის ფასზე სხვა ვალუტებთან მიმართებით), ასევე პირველ რიგში, ფასების ზრდის (ინფლაციის) დონეზე ქვეყანაში.

კობა გვენეტაძე ეროვნული ბანკის პრეზიდენტად პარლამენტმა 2016 წლის გაზაფხულზე დაამტკიცა. მას ამ თანამდებობაზე მუშაობის ვადა 4 წლის შემდეგ ეწურება.