მოსამართლეობის კანდიდატმა სასამართლო სისტემის დამოუკიდებლობის წინაპირობა დაასახელა

"აქ უბრალოდ ჩემი ღირსების საკითხი დადგა და ამიტომ ვარ თქვენს წინაშე", - ამის შესახებ უზენაესი სასამართლოს მოსამართლეობის კანდიდატმა ნინო ქადაგიძემ პარლამენტში, იურიდიულ საკითხთა კომიტეტის სხდომაზე განაცხადა, სადაც დეპუტატები მას უსმენენ. 

ნინო ქადაგიძის თქმით, თავისი "იდეაფიქსი უზენაესი სასამართლოს მოსამართლეობა ნამდვილად არ არის, თუმცა ამით ამ პროცესს არ აკნინებს, პირიქით".

"ამ 10-კაციან სიას მოჰყვა ასეთი ხმაური, ამიტომ ვდგავარ თქვენს წინაშე და ვცდილობ დავადასტურო, რომ ვარ ღირსი ვიჯდე აქ. ჩემთვის მოსამართლის საქმიანობა არის ძალიან მნიშვნელოვანი. მე წავედი სისტემიდან ცოტა ხნით და მივხვდი, რომ მჭირდებოდა და ამიტომ დავბრუნდი", - თქვა ნინო ქადაგიძემ.

მოსამართლეობის კანდიდატის განცხადებით, მისთვის მთავარია რომ მოსამართლე იყოს, ხოლო ინსტანციას თუ სად იმსახურებს, მნიშვნელობა არ აქვს.

"ჩემს ცხოვრებაში არის გადამწყვეტი ის საკითხი, რომ ვიყო მოსამართლე და ვაკეთო ის საქმე, რომელიც მიყვარს. რომელ ინსტანციაში გავაკეთებ ამ საქმეს, ამას ჩემთვის გადამწყვეტი მნიშვნელობა არ აქვს", - განაცხადა მოსამართლეობის კანდიდატმა.

ნინო ქადაგიძემ სასამართლოს დამოუკიდებლობის შესახებაც ილაპარაკა და თქვა, რომ მხოლოდ იმ შემთხვევაშია შესაძლებელი მოსამართლისა და სასამართლოს დამოუკიდელობაზე საუბარი, თუ "თუ მინიმუმ ორჯერ მაინც შეიცვლება ხელისუფლების ორი შტო და მესამე, რომელიც არის სასამართლო, დარჩება თავის ადგილზე მყარად. ამ შემთხვევაში შეგვიძლია განვაცხადოთ, რომ ქვეყანაში სასამართლო შედგა". 

"ვფიქრობ, რომ სასამართლოს განვითარებას ვერ დაეწია პროკურატურის განვითარებაც, ანუ რეფორმა იმ პერიოდში პროკურატურაში არ ჩატარდა. საპროცესო შეთანხმებები, რომლებიც უამრავი მოდიოდა სასამართლოში, მოსამართლეს შეთანხმების ეტაპზე არ რჩებოდა არაფერი, გარდა იმისა, რომ დაედასტურებინა. ამიტომ, როცა პოლიტიკა არის ნულოვანი ტოლერანტობა და ამას ემთხვევა ის კანონმდებლობა, რომელიც, ჩემი აზრით არის უსამართლო, მხოლოდ მოსამართლეებს ვერ დავაბრალებთ იმას, რომ გადაწყვეტილებები იყო ისეთი, როგორიც იყო. იმედს ვიტოვებ, რომ ეს პარლამენტი მაინც შეძლებს იმ ხარვეზების აღმოფხვრას სისხლის სამართალში, რომელიც რჩება და ხელს უშლის მოსამართლეს", - განაცხადა უზენაესი სასამართლოს მოსამართლეობის კანდიდატმა ნინო ქადაგიძემ. 

წინა დღეებში პარლამენტის იურიდიულ კომიტეტში უზენაესი სასამართლოს უვადო მოსამართლეობის კანდიდატებს: შოთა გეწაძეს, მერაბ გაბინაშვილს, თამარ ალანიას, მირანდა ერემაძეს, მამუკა ვასაძეს, მაია ვაჩაძეს, თამარ ზამბახიძეს, შალვა თადუმაძეს, ზაზა თავაძეს, ვლადიმერ კაკაბაძეს, გიორგი მიქაუტაძეს, პაატა სილაგაძეს, ნუგზარ სხირტლაძეს და ლალი ფაფიაშვილს მოუსმინეს.