ოპოზიცია არჩევნების გერმანული მოდელით ჩატარებას ითხოვს

„ლეიბორისტული პარტიის“ ოფისში რამდენიმესაათიანი შეხვედრა დასრულდა, რომელსაც თითქმის ყველა ოპოზიციური პარტიის წარმომადგენლები ესწრებოდნენ. 

როგორც შეხვედრის დასრულების შემდეგ ოპოზიციის წარმომადგენლებმა განაცხადეს, რომ არჩევნების ე.წ. გერმანული მოდელით ჩატარებას ითხოვენ.

„ახალი საქართველოს” ლიდერის გიორგი ვაშაძის თქმით, მთავრობა უნდა გადადგეს, ცესკო უნდა შეიცვალოს და ვადამდელი არჩევნები გერმანული მოდელით ჩატარდეს.

„მექანიზმი ნაპოვნია და ყველაფერი უნდა მივიყვანოთ გამარჯვებამდე. ძალიან დიდი დისკომფორტი ექნება “ქართულ ოცნებას”, ეს არის აღელვებული დიპლომატიური კორპუსი, ეს არის აღელვებული ქართველი ხალხი და უზარმაზარი პრობლემები, რომელსაც ჩვენ მათ შევუქმნით. ამ გამარჯვებას მათ არ დავუთმობთ”,- განაცხადა ვაშაძემ.

ანალოგიური განცხადება გააკეთა „თავისუფალი საქართველოს“ ლიდერმა, კახა კუკავამაც. „მიგვაჩნია, რომ კონსტიტუციურ-სამართლებრივი თვალსაზრისით ყველაზე სწორი გამოსავალი იქნება ე.წ. გერმანული მოდელი, რომელიც არ მოითხოვს კონსტიტუციურ ცვლილებას და რომლისთვისაც საკმარისი იქნება 30 დეპუტატი საპარლამენტო უმრავლესობიდან. ეს ივანიშვილს გამოაცლის თავის უკანასკნელ არგუმენტს, რომელსაც ჩვენს საზოგადოებაში ისედაც არ არის ლეგიტიმური".

მანამდე „შენების მოძრაობის“ ლიდერმა, დავით უსუფაშვილმა განაცხადა, რომ შექმნილი ვითარებიდან გამოსავალი ე.წ. გერმანული საარჩევნო სისტემის მიღება იქნება.

კონსულტაციები „ლეიბორისტული პარტიის“ ოფისში ხვალაც გაგრძელდება. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.

საპარლამენტო უმრავლესობა განმარტავს, რა სისტემით ჩატარდება 2020 წლის არჩევნები. განცხადება გაავრცელა მმართველი პარტიის ლიდერმაც. ოპოზიციური პარტიები მხარდამჭერებს პარლამენტთან აქციაზე მისვლისკენ მოუწოდებენ. 

ვინ დაუჭირა მხარი და ვინ იყო პროპორციულ საარჩევნო სისტემაზე გადასვლის წინააღმდეგი, ამ ბმულზე ნახეთ.