კობახიძე: გერმანული მოდელი საქართველოს კონსტიტუციასთან თავსებადი არ არის

გერმანული საარჩევნო მოდელი საქართველოს კონსტიტუციას არ ესაბამება. ამის შესახებ „ქართული ოცნების“ ცენტრალურ ოფისში საპარლამენტო უმრავლესობის სხდომის დასრულების შემდეგ ჟურნალისტებს ირაკლი კობახიძემ განუცხადა. 

„დღეს რამდენიმე შემოთავაზება მოვისმინე, რომელთაგან არცერთი არ არის თავსებადი მოქმედ სამართლებლივ ჩარჩოსთან. ერთი არის გერმანული მოდელი, რომელიც ითვალისწინებს, რომ 150-ვე მანდატი პროპორციული წესით ნაწილდება, და ჩვენ კონსტიტუციაში გვიწერია, რომ 77 დეპუტატი აირჩევა პროპორციული წესით და 73 დეპუტატი მაჟორიტალური წესით. აქ არის თავსებადობის პრობლემა“, - განაცხადა კობახიძემ. 

მისი თქმით, სხვა შეთავაზებებს შორის იყო ჩავარდნილი კანონპროექტის ხელახლა განხილვა, რაც, კონსტიტუციიდან გამომდინარე, ასევე შეუძლებელია.

კობახიძემ დასძინა, რომ ქვეყანა უნდა მუშაობდეს იმ ციკლებით, რომლებიც არის გათვალისწინებული ქვეყნის კონსტიტუციით, რომლის მიხედვით საპარლამენტო არჩევნები 31 ოქტომბერს ჩატარდება. ის პოლიტიკურ პარტიებს არჩევნებისთვის მზადებისკენ მოუწოდებს. 

შეხვედრის შემდეგ კომენტარი გია ვოლსკიმაც გააკეთა, რომელმაც აღნიშნა, რომ რიგგარეშე არჩევნების ჩატარების წინაპირობა არ არსებობს.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.

საპარლამენტო უმრავლესობა განმარტავს, რა სისტემით ჩატარდება 2020 წლის არჩევნები. განცხადება გაავრცელა მმართველი პარტიის ლიდერმაც. 

15 ნოემბერს „შენების მოძრაობის“ ლიდერმა დავით უსუფაშვილმა განაცხადა, რომ შექმნილი ვითარებიდან გამოსავალს ე.წ. გერმანული საარჩევნო სისტემის მიღებაში ხედავს. მას სხვა ოპოზიციური პარტიების წარმომადგენლებიც დაეთანხმნენ.

ვინ დაუჭირა მხარი და ვინ იყო პროპორციულ საარჩევნო სისტემაზე გადასვლის წინააღმდეგი, ამ ბმულზე ნახეთ.