რევაზ არველაძე: თუ პარლამენტში არ შემიშვებენ წავალ და ლექციებს წავიკითხავ

პარლამენტის უხუცესი დეპუტატის, უმრავლესობის წევრის, რევაზ არველაძის განცხადებით, თუ პარლამენტში არ შეუშვებენ, წავა და ლექციებს წაიკითხავს. ამის შესახებ არველაძემ პარლამენტის შენობასთან თქვა, სადაც ის აქციის მონაწილეებმა არ შეუშვეს. 

"როცა იქნება პარლამენტში შესვლის საშუალება, რა თქმა უნდა, მივალ. თუ არ მომეცემა პარლამენტში შესვლის საშუალება, ტექნიკური უნივერსიტეტის პროფესორი გახლავართ, წავალ და წავიკითხავ ლექციებს", - განაცხადა რევაზ არველაძემ.

პარლამენტის შესასვლელთან ხმაურია, აქციის მონაწილეები დეპუტატებს შენობაში არ უშვებენ. დემონსტრანტები არველაძეს შეძახილებით დახვდნენ და სკანდირებდნენ "მონა". არველაძე იმ დეპუტატებს შორისაა, რომელმაც მხარი დაუჭირა პროპორციულ სისტემაზე გადასვლას. 

მეორე დეპუტატი მერაბ ქვარაია იყო, რომელმაც მხარი არ დაუჭირა პროპორციულ საარჩევნო სისტემაზე გადასვლას. მან ტერიტორია პოლიციის დახმარებით დატოვა. 

17 ნოემბერს ღამე აქციის მონაწილეებმა და ოპოზიციის წარმომადგენლებმა პარლამენტის შესასვლელები ტომრებით ჩაკეტეს, მანამდე კი პარლამენტის ჭიშკარს ბოქლომი დაადეს, რასაც მმართველი გუნდიდან რომან კაკულიამ უპასუხა, რომ პარლამენტის ბლოკირება დიალოგის გზას სპობს. პარალელურად აქცია გამართა „პატრიოტთა ალიანსმაც“.

გაერთიანებული ოპოზიციის მოთხოვნებია: „ვადამდელი პროპორციული არჩევნები, მთავრობის გადადგომა და სამოქალაქო საზოგადოებით დაკომპლექტებული ცესკო“. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით, მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.