ჯანდაცვის ყოფილმა მინისტრმა C ჰეპატიტის ელიმინაციის პროგრამაზე განმარტებები გააკეთა

ჯანდაცვის ყოფილმა მინისტრმა დავით სერგეენკომ C ჰეპატიტის ელიმინაციის პროგრამასთან დაკავშირებით განმარტებებით გააკეთა. საუბარია სახელმწიფო აუდიტის დასკვნაზე, რომლის თანახმადაც, C ჰეპატიტის მართვის პროგრამის ფარგლებში საქართველოს მიერ უსასყიდლოდ მიღებული, 560 645 083 ლარის ღირებულების მედიკამენტებს ვადა გაუვიდა. 

დავით სერგეენკოს განცხადებით, ამით არც ერთი პაციენტი არ დაზარალებულა. მისი თქმით, 2015-16 წლებში ამ პროგრამაში ჩართვაზე მოთხოვნა უფრო მაღალი იყო, ვიდრე პროგრამის შესაძლებლობები, 2018 წელს სამინისტროს უკვე პაციენტების მოძიება უწევდა. მეორე საკითხი რომელიც შეეხება პაციენტების მიერ ვადაგასული პრეპარატებით მკურნალობის საკითხს. დავით სერგეენკო ამბობს, რომ ამ პერიოდში პაციენტები ვადაგასული წამლით არ მკურნალობდნენ. 

"ამ პერიოდში ჩვენ უკვე შემოსული გვქონდა ახალი პარტია, რომელიც ვადიანი იყო. ყველა დამეთანხმება, რომ ნახევარ მილიარდზე მეტი მედიკამენტი ერთგვარად, ბრუტალურად ჟღერს და უამრავი კითხვა რჩება. შეგახსენებთ, რომ საქართელო ამ მედიკამენტს იღებს უფასოდ. სახელმწიფო აუდიტის სამსახური ვალდებული იყო, რომ რაღაც განფასება გაეკეთებინა ამ დონაციაზე. ვვარაუდობ, რომ მათ აიღეს ვიკიპედიაში ან რაღაც ასეთ პორტალში ნანახი 2016 წლის ფასები, სადაც ეს მართლაც მაღალი ღირებულების არის. 2018 წელს ეს უკვე რვაჯერ ნაკლები ღირდა. თუ იგივე ფასებს ავიღებთ, გამოვა რომ დღეისათვის ჩვენ უკვე 17 მილიარდი ლარის მედიკამენტი გვაქვს დახარჯული იმ 65 ათასი პაციენტის მკურნალობაზე", - განაცხადა დავით სერგეენკომ.

სერგეენკო აცხადებს, რომ მედიკამენტების ვადაგასულობასთან დაკავშირებით, უწყებას პარტნიორებთან კომუნიკაცია ჰქონდა და მათ ამის შესახებ იცოდნენ. "ჩვენ გვქონდა შეთავაზება, რომ სხვა ქვეყნისთვის გადაგვეცა [მედიკამენტი] ეს ნაწილი დონაციის სახით. თუმცა მათ ხაზი გაუსვეს ეს არის მხოლოდ საქართველოს ექსკლუზივი მედიკამენტი და უფასოდ მთელ დედამიწაზე აქვს მხოლოდ საქართველოს", - განაცხადა დავით სერგეენკომ. 

სერგეენკოს განმარტებით, 2018 წელს იყო 30 ათასამდე ადამიანი, რომელმაც იცოდა რომ ჰქონდა C ჰეპატიტი, თუმცა ამა თუ იმ მიზეზით არ ერთვებოდა მკურნალობაში. "დღეის მდგომარეობით, ასეთი არის 30 ათასი ადამიანი. მე ყოველთვის ვცდილობ, დავიცვა ექიმის კოდექსი, რომელთაგან ერთ-ერთი წესი ამბობს, რომ თუ ექიმმა რაღაც აუხსნა პაციენტს, მაგრამ მან არ გააკეთა ეს, არავითარ შემთხვევაში არ დაადანაშაულო პაციენტი, ამ შემთხვევაშიც იგივე ლოგიკაა. მე ამ ადამიანებს არ ვადანაშაულებ, უბრალოდ კიდევ ერთხელ ვთხოვ, რომ ეს შესაძლებლობა გამოიყენონ", - განაცხადა დავით სერგეენკომ. 

სახელმწიფო აუდიტის სამსახურის მედიასა და საზოგადოებასთან ურთიერთობის სამსახურში კი განმარტავენ, რომ ჯანდაცვის სამინისტროს ფინანსური აუდიტის ანგარიშში დასახელებული ცე ჰეპატიტის სამკურნალო მედიკამენტების ღირებულება -  560,645,083 ლარი - ასახულია  სამინისტროს მიერ მომზადებულ კონსოლიდირებულ ფინანსურ ანგარიშგებაში, 2018 წლის 31 დეკემბრის მდგომარეობით.

„ფინანსური აუდიტი წარიმართა აუდიტის საერთაშორისო სტანდარტის შესაბამისად, რომლის თანახმად სახელმწიფო აუდიტის სამსახურს არ აქვს ვალდებულება განახორციელოს სხვა უწყებაში აღრიცხული აქტივების გადაფასება. უწყების ფინანსურ ანგარიშგებაში არსებული აქტივების სამართლიანი ღირებულებით წარდგენა  უშუალოდ სამინისტროს ვალდებულებას წარმოადგენს„, - აღნიშნეს აუდიტის სამსახურში.