არასამთავრობოები მოუწოდებენ ხელისუფლებას, დაელოდოს ვენეციის კომისიის დასკვნას

11 არასამთავრობო ორგანიზაცია ხელისუფლებას მოუწოდებს, დაელოდოს ვენეციის კომისიის საბოლოო დასკვნას, რომელიც ოქტომბერში გამოქვეყნდება და მხოლოდ ამის შემდეგ მიიღოს კონსტიტუცია. ორგანიზაციებმა საგანგებო განცხადებაც გაავრცელეს.

"მივმართავთ საპარლამენტო უმრავლესობას, აუცილებლად  გაითვალისწინოს ვენეციის კომისიის მოწოდებები და დაელოდოს ამ უწყების საბოლოო შეფასების გამოქვეყნებას. წინააღმდეგ შემთხვევაში, შეიძლება მნიშვნელოვნად შეილახოს საქართველოს საერთაშორისო რეპუტაცია. დანაპირების არშესრულება და პარტნიორების შეცდომაში შეყვანა, რა თქმა უნდა, უარყოფითად იქნება აღქმული მათ მიერ. გარდა ამისა, კიდევ ერთხელ აღვნიშნავთ, რომ შემდეგი არჩევნებისთვის არსებული საარჩევნო სისტემის შენარჩუნება არ ემსახურება ქვეყნის დემოკრატიული განვითარების მიზნებს და ჯანსაღი პოლიტიკური გარემოს ჩამოყალიბებას, რომელიც აუცილებელია მრავალპარტიული და მაღალი ლეგიტიმაციის მქონე პარლამენტის არსებობისთვის. მინიმალური პოლიტიკური კომპრომისის არარსებობა და მსგავსი ერთპიროვნული გადაწყვეტილება საფრთხის ქვეშ აყენებს ქვეყნის სტაბილური განვითარების პერსპექტივებს. კონსტიტუცია სახალხო თანხმობის დოკუმენტია და აუცილებელია, მის შინაარსს იზიარებდნენ საზოგადოების ფართო ფენები", - წერია არასამთავრობოების განცხადებაში.

განცხადების ხელმომწერები არიან: საერთაშორისო გამჭვირვალობა საქართველო, სამართლიანი არჩევნებისა და დემოკრატიის საერთაშორისო საზოგადოება, ფონდი ღია საზოგადოება საქართველო, საქართველოს ახალგაზრდა იურისტთა ასოციაცია, სამოქალაქო განვითარების სააგენტო, ინფორმაციის თავისუფლების განვითარების ინსტიტუტი, საქართველოს რეფორმების ასოციაცია (GRASS), სტრატეგიული კვლევების რეგიონული ცენტრი, ეკონომიკური პოლიტიკის კვლევის ცენტრი (EPRC), 
საქართველოს დემოკრატიული ინიციატივა და ლიბერალური აკადემია თბილისი.

ვენეციის კომისიის პრეზიდენტმა მხარეებს 6 სექტემბერს სტრასბურგში შეხვედრა შესთავაზა. თუმცა საპარლამენტო უმრავლესობამ საკონსტიტუციო რეფორმასთან დაკავშირებით 1 სექტემბერს სპეციალური განცხადება გაავრცელა, რომლის მიხედვითაც საპარლამენტო უმრავლესობამ უარი თქვა სტრასბურგში ვიზიტზე. ტექსტში ასევე წერია, რომ უმრავლესობა კონსტიტუციის პროექტს შემოდგომაზე მესამე მოსმენით დაამტკიცებს.

5 სექტემბერს ოპოზიციამ ვენეციის კომისიას ერთობლივი წერილი გაუგზავნა, რომელშიც პარტიები საკონსტიტუციო რეფორმასთან დაკავშირებით მოლაპარაკებების ჩაშლაში „ქართულ ოცნებას“ ადანაშაულებენ.

რაც შეეხება კონსტიტუციის პროექტში ჩასწორებების შეტანას, პარლამენტის თავმჯდომარემ 5 სექტემბერს ეს ინფორმაცია უარყო. 

პარლამენტმა საკონსტიტუციო ცვლილებები მეორე მოსმენით 23 ივნისს მიიღო.