ეკა გიგაური: დისკუსიაში ჩართვა მესამე მოსმენის დროს აზრს კარგავს

"საერთაშორისო გამჭვირვალობა-საქართველოს" აღმასრულებელი დირექტორი ეკა გიგაური საკონსტიტუციო ცვლილებებზე მესამე მოსმენის ფარგლებში გასამართ დისკუსიაში არასამთავრობო სექტორის ჩართვის აზრს ვერ ხედავს, ვინაიდან მესამე მოსმენის დროს მხოლოდ რედაქციული ტიპის ცვლილებების შეტანაა შესაძლებელი. ამ საკითხზე ეკა გიგაურის კომენტარს სააგენტო ipn-ი ავრცელებს.

"ჩვენ პროცესს ისედაც ვაკვირდებით და მონიტორინგს ვუწევთ, თუმცა მეორე მხრივ, დისკუსიაში ჩართვა მესამე მოსმენის დროს აზრს კარგავს. აქ მხოლოდ და მხოლოდ რედაქციული ტიპის ცვლილებების შეტანაა შესაძლებელი. ეს შემოთავაზება არის, სავარაუდოდ, გათვლილი იმაზე, რომ საზოგადოება შეცდომაში შეიყვანონ, რომ თითქოს მმართველი პარტია ღიაა დისკუსიისთვის. თუმცა, იმ დროს როდესაც ნამდვილად იყო შანსი, რომ გავლენა მოგვეხდინა პროცესზე და ჩვენი რეკომენდაციები წარმოგვედგინა, ეს არ მოხდა. მესამე მოსმენის დროს ჩვენი ჩართულობა აზრს კარგავს, რადგან მხოლოდ შესაძლებლობა გვექნება, ვუთხრათ, თუ სად ჩაამატონ მძიმე ან წერტილი", - განაცხადა ეკა გიგაურმა. 

საპარლამენტო უმრავლესობის ლიდერის არჩილ თალაკვაძის განცხადებით, საკონსტიტუციო ცვლილებებთან დაკავშირებით დისკუსია საშემოდგომო სესიისას გაიმართება და მასში მონაწილეობას დაინტერესებული მხარეები შეძლებენ.

6 სექტემბერს 11-მა არასამთავრობო ორგანიზაციამ ხელისუფლებას მოუწოდა, რომ ვენეციის კომისიის დასკვნას დაელოდოს. თამარ ჩუგოშვილის თქმით, საკონსტიტუციო ცვლილებების სექტემბრის ბოლოს, მესამე მოსმენით მიღებამდე, პარლამენტი ვენეციის კომისიისგან კონსტიტუციის პროექტზე შუალედურ ანგარიშს მიიღებს და გაეცნობა.

ვენეციის კომისიის პრეზიდენტმა მხარეებს 6 სექტემბერს სტრასბურგში შეხვედრა შესთავაზა.

თუმცა საპარლამენტო უმრავლესობამ საკონსტიტუციო რეფორმასთან დაკავშირებით 1 სექტემბერს სპეციალური განცხადება გაავრცელა, რომლის მიხედვითაც საპარლამენტო უმრავლესობამ უარი თქვა სტრასბურგში ვიზიტზე, ამასთან ტექსტში წერია, რომ უმრავლესობა კონსტიტუციის პროექტს შემოდგომაზე მესამე მოსმენით დაამტკიცებს.

5 სექტემბერს ოპოზიციამ ვენეციის კომისიას ერთობლივი წერილი გაუგზავნა, რომელშიც პარტიები საკონსტიტუციო რეფორმასთან დაკავშირებით მოლაპარაკებების ჩაშლაში „ქართულ ოცნებას“ ადანაშაულებენ.

რაც შეეხება კონსტიტუციის პროექტში ჩასწორებების შეტანას, პარლამენტის თავმჯდომარემ 5 სექტემბერს ეს ინფორმაცია უარყო. 

პარლამენტმა საკონსტიტუციო ცვლილებები მეორე მოსმენით 23 ივნისს მიიღო.