კონსტიტუციის ალტერნატიული პროექტი ვენეციის კომისიას უკვე გადაეგზავნა

საკონსტიტუციო ცვლილებებთან დაკავშირებით პრეზიდენტისა და ოპოზიციური პარტიების ერთობლივი შეხედულებები წერილობით უკვე ვენეციის კომისიაშია. ადმინიტრაციამ შეთანხმებული პოზიცია დოკუმენტის სახით ევროპელ ექსპერტებს გადაუგზავნა.

როგორც პრეზიდენტის მრჩეველი ფიქრია ჩიხრაძე აცხადებს, აუცილებელია ხელისუფლებამ გამოიჩინოს პოლიტიკური ნება და ქვეყნის მთავარი კანონი კონსენსუსის საფუძველზე შემუშავდეს. მისი განცხადებით, წინააღმდეგ შემთხვევაში, ეს იქნება ერთჯერადი კონსტიტუცია, რომელიც მხოლოდ ქართულ ოცნების ხელისუფლებაში ყოფნის პერიოდში იარსებებს. პრეზიდენტის მრჩეველი განმარტავს, რომ კონსტიტუციის არსებული ვარიანტის გადახედვის სამართლებრივი გზა იმ შემთხვევაში გამოინახება, თუ ამის პოლიტიკური ნება იქნება.

ამასთან, ფიქრია ჩიხრაძე პრეზიდენტის მხრიდან ვეტოს გამოყენებაზე საუბარს ნაადრევს უწოდებს და აცხადებს, რომ ამ გადაწყვეტილებას ქვეყნის პირველი პირი მმართველი გუნდის ქმედებების შესაბამისად მიიღებს. 

"იმედია, ამჯერად მაინც მმართველი პარტია თვალს გაუსწორებს რეალობას და გადადგამს ნაბიჯს კონსენსუსისკენ. ეს სასიცოცხლოდ აუცილებელია, შევქმნათ ქმედითი, კრიზისების თავიდან ამცილებელი დოკუმენტი, რომლითაც იცხოვრებს ქვეყანა გრძელვადიან პერიოდში, თორემ ეს გამოვა ერთჯერადი კონსტიტუცია, რომელიც იცხოვრებს მხოლოდ იმ ვადით, რა ვადითაც „ქართული ოცნება“ იქნება ხელისუფლებაში. ვეტოზე წინასწარ ლაპარაკი გაუმართლებელია, მზად ვართ ყველაფერი გავაკეთოთ კონსესუსისთვის", - განაცხადა ფიქრია ჩიხრაძემ.

გუშინ საქართველოს პრეზიდენტმა გიორგი მარგველაშვილმა სპეციალურ ბრიფიგნზე განაცხადა, რომ პრეზიდენტის ადმინისტრაცია და ოპოზიცია კონსტიტუციაში შესატან ცვლილებებზე შეთანხმდა.

პრეზიდენტი და 20 ოპოზიციური პარტია შემდეგ საკითხებზე შეთანხმდა:

1. პროპორციული საარჩევნო სისტემის დაუყოვნებლივ შემოღება და პრეზიდენტის პირდაპირი არჩევის წესის შენარჩუნება;

2. ბარიერის დაწევა 3%-მდე და საარჩევნო ბლოკების შენარჩუნება;

3. უშიშროების საბჭოს კონსტიტუციურ ორგანოდ შენარჩუნება; ქვეყნის თავდაცვისუნარიანობის და უსაფრთხოების უკეთ ორგანიზება;

4. საპარლამენტო ზედამხედველობის გაძლიერება;

5. სასამართლო ხელისუფლების დამოუკიდებლობის გაძლიერება.

საქართველოს პრეზიდენტმა გიორგი მარგველაშვილმა ოპოზიციურ პარტიებს შესთავაზა საკონსტიტუციო ცვლილებების საკუთარი ვერსია შექმნან და “ქართულ ოცნებას“ გააცნონ. ამის შესახებ მარგველაშვილმა 11 სექტემბერს ოპოზიციური პარტიების წარმომადგენლებთან შეხვედრისას განაცხადა, რა დროსაც საკონსტიტუციო ცვლილებები განიხილეს. 

კონსტიტუციის საბოლოო ვერსიას პარლამენტი მომდევნო კვირას მესამე მოსმენით უყრის კენჭს. მანამდე კი, სავარაუდოდ, 22 სექტემბერს, ვენეციის კომისიის დასკვნა გახდება ცნობილი.

უმრავლესობის წევრები კენჭისყრისთვის ემზადებიან, თუმცა არ გამორიცხავენ, რომ მანამდე პრეზიდენტის მორიგი ვეტოს დაძლევა მოუხდეთ.

პარლამენტმა საკონსტიტუციო ცვლილებები მეორე მოსმენით 23 ივნისს მიიღო.