პრეზიდენტი კონსტიტუციის ალტერნატიულ ვარიანტს არასამთავრობოებს აცნობს

პრეზიდენტი ოპოზიციასთან შეთანხმებულ საკონსტიტუციო ცვლილებების ალტერნატიულ ვარიანტს არასამთავრობო ორგანიზაციებს აცნობს. შეხვედრა პრეზიდენტის ადმინისტრაციაში მიმდინარეობს.

"დღეს შემუშავებული დოკუმენტი არის ერთპარტიული. ჩვენ გადავწყვიტეთ შევცვალოთ მხოლოდ ის მუხლები, რომლის თაობაზეც ყველა პოლიტიკური პარტია აცხადებდა თანხმობას. მადლობა მინდა ვუთხრა პოლიტიკურ პარტიებს, რომლებიც ამ რთულ ვითარებაში შეძლეს და დაათმეს საკუთარი შეხედულებები და მივიდნენ კონსენსუსამდე. პროცესი იყო აგებული შემდეგნაირად, ამოსავლად ვიღებთ "ქართული ოცნების" მიერ შემუშავებულ კონსტიტუციურ პროექტს, ამოსავალი იყო ის, რომ არცერთი პარტია დამოუკიდებლად არ ჩაასწორებდა და ამ დათმობით მივედით სულ რამდენიმე მუხლის ჩასწორებამდე. ამ პროცესით მივედით თანხმობის დოკუმენტამდე. ეს არის შედეგი, დოკუმენტი გადაეგზავნა საქართველოს პარლამენტს ვენეციის კომისიას. მაქვს იმედი, რომ ჩვენ უნდა შევთანხმდეთ, ეს ფაქტი იქნება გააზრებული. მაქვს იმედი, რომ მმართველი პარტია გაიაზრებს, რომ პულტებით, ხელის გადაგრეხით ვერ მივიღებთ თანხმების დოკუმენტს" , - განაცხადა საქართველოს პრეზიდენტმა.

დოკუმენტი უკვე გადააგზავნეს ვენეციის კომისიასა და უმრავლესობაში, თუმცა მმართველი გუნდი მას ოთხ პუნქტიან ულტიმატუმად აღიქვამს. 

გუშინ საქართველოს პრეზიდენტმა გიორგი მარგველაშვილმა სპეციალურ ბრიფიგნზე განაცხადა, რომ პრეზიდენტის ადმინისტრაცია და ოპოზიცია კონსტიტუციაში შესატან ცვლილებებზე შეთანხმდა.

პრეზიდენტი და 20 ოპოზიციური პარტია შემდეგ საკითხებზე შეთანხმდა:

1. პროპორციული საარჩევნო სისტემის დაუყოვნებლივ შემოღება და პრეზიდენტის პირდაპირი არჩევის წესის შენარჩუნება;

2. ბარიერის დაწევა 3%-მდე და საარჩევნო ბლოკების შენარჩუნება;

3. უშიშროების საბჭოს კონსტიტუციურ ორგანოდ შენარჩუნება; ქვეყნის თავდაცვისუნარიანობის და უსაფრთხოების უკეთ ორგანიზება;

4. საპარლამენტო ზედამხედველობის გაძლიერება;

5. სასამართლო ხელისუფლების დამოუკიდებლობის გაძლიერება.

საქართველოს პრეზიდენტმა გიორგი მარგველაშვილმა ოპოზიციურ პარტიებს შესთავაზა საკონსტიტუციო ცვლილებების საკუთარი ვერსია შექმნან და “ქართულ ოცნებას“ გააცნონ. ამის შესახებ მარგველაშვილმა 11 სექტემბერს ოპოზიციური პარტიების წარმომადგენლებთან შეხვედრისას განაცხადა, რა დროსაც საკონსტიტუციო ცვლილებები განიხილეს. 

კონსტიტუციის საბოლოო ვერსიას პარლამენტი მომდევნო კვირას მესამე მოსმენით უყრის კენჭს. მანამდე კი, სავარაუდოდ, 22 სექტემბერს, ვენეციის კომისიის დასკვნა გახდება ცნობილი.

უმრავლესობის წევრები კენჭისყრისთვის ემზადებიან, თუმცა არ გამორიცხავენ, რომ მანამდე პრეზიდენტის მორიგი ვეტოს დაძლევა მოუხდეთ.

პარლამენტმა საკონსტიტუციო ცვლილებები მეორე მოსმენით 23 ივნისს მიიღო.