პრეზიდენტი მმართველ პარტიას აკრიტიკებს

მმართველმა პარტიამ მოიგო კიდევ ერთხელ დიდი უმრავლესობით და ეს, რა თქმა უნდა, მისალოცია, მაგრამ მისალოცია თუ არა ქართული დემოკრატიისთვის, ამაზე კიდევ შეგვიძლია ბევრი ვიმსჯელოთ, – ამის შესახებ საქართველოს პრეზიდენტმა ტელეკომპანია “მაესტროს“ ეთერში განაცხადა

გიორგი მარგველაშვილის თქმით, ქვეყანაში, სადაც ყველა ძირითადი სახელისუფლებო ვერტიკალი და ბერკეტები ერთი პარტიის ხელშია, შეიძლება დემოკრატიის სისრულის, მთლიანობის შესახებ კითხვის ნიშნები გაჩნდეს.

„მე არ ვთვლი, რომ არჩევნებზე საზოგადოების ძირითადი ნების გამოვლენა შეცვლილი იყო. მაგრამ თუ მცირე დეტალებს შევხედავთ, ვიტყვით იმასაც, რომ ახლა უკვე გვაქვს ისეთი ოლქები და უბნები, სადაც ერთი ხმით, ათი ხმით იგებენ სხვადასხვა პარტიის წარმომადგენლები, ჩვენ ვნახავთ, რამდენად უნდა გავუფრთხილდეთ თვითონ საარჩევნო პროცესს.

რაც შეეხება მმართველ პარტიას, მმართველმა პარტიამ მოიგო კიდევ ერთხელ დიდი უმრავლესობით და ეს, რა თქმა უნდა, მმართველი პარტიისთვის არის მისალოცი, მაგამ მისალოცია თუ არა ქართული დემოკრატიისთვის, ამაზე კიდევ შეგვიძლია ბევრი ვიმჯელოთ, იმიტომ, რომ ერთ-ერთი სერიოზული კითხვის ნიშანი, რომელიც ჩვენს დემოკრატიასთან დაკავშირებით უკვე დაისვა და დამიჯერეთ, ამ კითხვის ნიშნის სულისკვეთება გაღრმავდება"-განაცხადა გიორგი მარგველაშვილმა.

მისივე თქმით, როდესაც მთელი სახელისუფლებო ვერტიკალი კონცენტრირებული გაქვს ერთი პარტიის ხელში, ეს საშიშროებაა.

”მე მინდა საზოგადოებამ იცოდეს, რომ როდესაც არ არის მაკონტროლებელი და დამაბალანსებელი, ანა-ბანას ვლაპარაკობ, მაშინ ნებისმიერი პოლიტიკური ძალისთვის ძალიან ძნელი პერიოდი დგება. ასეთი ძნელი პერიოდი დამდგარა ”მოქალაქეთა კავშირისთვის”, ”ნაციონალური მოძრაობისთვის”. მე არ მინდა, რომ ხელისუფლების კონსოლიდაციით და საკუთარი სიძლიერით აღფრთოვანებულმა ”ქართულმა ოცნებამ” ამ რთულ გზაზე დაიწყოს სვლა. არც ”ქართული ოცნებისთვის” მინდა და არც ჩვენი სახელმწიფოსთვის”, - განაცხადა მარგველაშვილმა.

საქართველოში თვითმმართველობის არჩევნები 21 ოქტომბერს ჩატარდა.