7 ნოემბრის მოვლენებს საპარლამენტო უმრავლესობა ეხმიანება

საპარლამენტო უმრავლესობის წევრი ანრი ოხანაშვილი 10 წლის წინ თბილისში განვითარებულ მოვლენებს და ტელეკომპანია "იმედში" შეჭრის ფაქტს გამოეხმაურა.

ოხანაშვილი აცხადებს, რომ ყველა ის ადამიანი გმირია, ვინც ძალადობას ებრძოდა და სწორედ იმ პროცესებში მონაწილე პოლიტიკოსებისა და ჟურნალისტების ძალისხმევით ქვეყანაში დასრულდა დრო, როდესაც მოქალაქეებს აზრის გამოხატვა ეზღუდებოდათ. 

"ეს იყო დღე და პერიოდი, როდესაც ადამიანის უფლებები ფეხქვეშ ითელებოდა. ჯერ რუსთაველის გამზირზე განვითარებული მოვლენები და შემდეგ "იმედში" შეჭრა, თავისუფალ მედიაზე თავდასხმა, სიტყვის და აზრის თავისუფლებაზე გალაშქრების დრო ჩაბარდა წარსულს, "-განაცხადა ანრი ოხანაშვილმა.

მიხეილ სააკაშვილის ხელისუფლების წინააღმდეგ თბილისში საპროტესტო აქციები 2007 წლის 2 ნოემბერს დაიწყო. 7 ნოემბრისთვის ოპოზიციამ პარლამენტის შენობის წინ კარვების გაშლის გადაწყვეტილება მიიღო. პარალელურად აქციები იმართებოდა სხვადასხვა სახელმწიფო დაწესებულებებთან.

ხელისუფლებამ რუსთაველის გამზირზე მცირერიცხოვანი აქციის ძალის გამოყენებით დაშლა გადაწყვიტა, რასაც მოქალაქეების უკმაყოფილება მოჰყვა, რომლებმაც რუსთაველის გამზირზე შეკრება დაიწყეს. აქცია პოლიციის სპეციალურმა დანაყოფებმა ცრემლსადენი გაზის, ხელკეტების, რეზინის ტყვიების, აკუსტიკური თოფებისა და წყლის ჭავლის გამოყენებით დაშალეს. იმავე საღამოს ტელეკომპანია „იმედში“ სპეცრაზმი შეიჭრა და არხის მაუწყებლობა გაითიშა.

პოლიტიკური კრიზისის საპასუხოდ, მაშინდელმა პრეზიდენტმა, მიხეილ სააკაშვილმა 15 დღით საგანგებო მდგომარეობა გამოაცხადა და ვადამდელი საპრეზიდენტო არჩევნები დანიშნა, რომელშიც სააკაშვილმა გაიმარჯვა.

2008 წელს, ტელეკომპანია "იმედი", თავისი დამფუძნებლის ბადრი პატარკაციშვილის გარდაცვალებიდან რამდენიმე დღეში, მის ოჯახს ჩამოართვეს. არხი თავდაპირველ მფლობელს მხოლოდ 2012 წლის საპარლამენტო არჩევნებში სააკაშვილის ხელისუფლების დამარცხების შემდეგ დაუბრუნდა. ამ საქმეზე სასამართლო გამოძიება დღესაც მიმდინარეობს.

"ნაციონალური მოძრაობის" ხელისუფლების შეცვლის შემდეგ, საქართველოს პროკურატურამ 2007 წლის 7 ნოემბრის აქციის დარბევისა და ტელეკომპანია "იმედში" შეჭრის ფაქტზე გამოძიება დაიწყო. მთავარი საგამოძიებო უწყება ყოფილ მაღალჩინოსნებს, მათ შორის ექსპრეზიდენტ სააკაშვილს, სხვა დანაშაულებთან ერთად 7 ნოემბრის მოვლენებზეც ედავებოდა. ამ საქმეზე გამოძიება ედავებოდა ასევე ვანო მერაბიშვილს, გიგი უგულავას, დავით კეზერაშვილს და ზურაბ ადეიშვილს.

ვანო მერაბიშვილი დღეს პატიმარია და რამდენიმე სხვა საქმის გამო ეგრეთ წოდებული მატროსოვის საპატიმრო დაწესებულებაში სასჯელს იხდის. გიგი უგულავა, რომელიც იგივე საპატიმროში იხდიდა სასჯელს, უკვე თავისუფალია. დავით კეზერაშვილზე, ზურაბ ადეიშვილზე და მიხეილ სააკაშვილზე საქართველოში ძებნაა გამოცხადებული. პროკურატურა მათ რამდენიმე სისხლის სამართლის საქმეზე ედავება.

2007 წლის 7 ნოემბრის მოვლენებზე გამოხმაურება დასავლურ პრესაში შეგიძლიათ წაიკითხოთ ამ ბმულზე.