სოფო კილაძე: პოლიციელებისთვის ახალი სამხრე კამერების შეძენა იგეგმება

ადამიანის უფლებათა დაცვის კომიტეტის თავმჯდომარის სოფო კილაძის ინფორმაციით, შს სამინისტრო პოლიციელებისთვის ახალი სამხრე კამერების შეძენას გეგმავს. ამის შესახებ დღეს დეპუტატმა ნუცუბიძის ფერდობზე, საპატრულო პოლიციის მიერ დაკავებისას გარდაცვლილი პაატა პავლიაშვილის საქმის კომენტირებისას ჟურნალისტებთან ისაუბრა.

„დღეს არსებული კამერები თავიანთი ტექნიკური მონაცემებით, დროის ძალიან დიდ მონაკვეთს ვერ იღებენ. როგორც ვიცი, შინაგან საქმეთა სამინისტროში დაგეგმილია ახალი კამერების შეძენა, თუმცა ესეც დიდ თანხებთან არის დაკავშირებული. შინაგან საქმეთა სამინისტრო მაქსიმუმს ცდილობს, რომ შესაბამისი ტექნიკური მონაცემების კამერები შეიძინოს. ეს იქნება უკეთესი როგორც მოქალაქეების დაცულობის, ასევე თავად პოლიციელებისთვის, რადგან როცა პოლიციელს ედავებიან, თუ ის მართალია, ადვილად შეუძლია დაამტკიცოს სიმართლე, თუ კამერები მუდმივად ჩართული იქნება“, - განაცხადა დღეს სოფო კილაძემ. 

გასული წლის 25 ოქტომბერს, ნუცუბიძეზე 33 წლის პაატა პავლიაშვილი იმ დროს გარდაიცვალა, როცა მას სამართალდამცველები ადმინისტრაციული წესით აკავებდნენ. საქმეზე გამოძიება 26 ოქტომბერს დაიწყო. საქმის ძიების პროცესში გაირკვა, რომ პავლიაშვილის დაკავებისას პოლიციელებს სამხრე კამერები ჩართული არ ჰქონდათ.

გუშინ კი პავლიაშვილის ოჯახის ადვოკატმა ლევან ვეფხვაძემ განაცხადა, რომ პოლიციელების მხრიდან შესაძლო უფლებამოსილების გადამეტების ფაქტზე დაწყებული გამოძიება შეწყდება.