ფარცხალაძე-თორდიას დაპირისპირების მიზეზი აუდიტის დასკვნაში მოხვდა

სახელმწიფო აუდიტის მიერ გამოწვეყნებულ საბოლოო დასკვნას, რომელშიც ოთარ ფარცხალაძის კომპანიისთვის მიწის გადაცემის საკითხიც მოხვდა, ლაშა თორდია ეხმიანება. ამის შესახებ რუსთავი 2 წერს.

ანგარიშში, რომლიც მერიის საკუთრებაში არსებული უძრავი ქონების მართვასა და განკარგვას შეეხება, წერია, რომ ყოფილი მთავარი პროკურორის კომპანიას მერიამ უკონკურენტო გარემო შეუქმნა. ლაშა თორდია აცხადებს, რომ აუდიტის საბოლოო დასკვნამ შუალედური ანგარიშში მოყვანილი ფაქტები კიდევ ერთხელ დაადასტურა.

„აუდიტის საბოლოო დასკვნამაც კიდევ ერთხელ დაადასტურა ის ფაქტები, რა ფაქტებზეც ჩვენ ვსაუბრობდით მაშინ. ეს შეეხება ოთარ ფარცხალაძის კომპანიის მიერ 580 ათას ლარად 2 მილიონ 600 ათასი ლარის აქტივის მქონე კომპანიის შესყიდვაზე, რომელიც რა თქმა უნდა, რისკებს შეიცავდა. შემდგომში ქალაქ თბილისის ქონების მართვის სააგენტოს მიერ ჩანაცვლების შემდგომ ასევე, კიდევ ჩატარდა აუქციონი, რომელიც ასევე, 40 პროცენტით ნაკლებ ფასში პირდაპირ მიყიდეს ფარცხალაძის კომპანიას,“ - განაცხადა თორდიამ.

ლაშა თორდია ამბობს, რომ დასკვნაში მოყვანილი ფაქტები გახდა მიზეზი მასსა და ფარცხალაძეს შორის მომხდარი დაპირისპირების მიზეზი. 

„გახსოვთ, შესწავლას, რაც მოჰყვა მაშინ, თავდასხმა ჩემზე, ჩვენ მაშინვე შუალედური ინფორმაცია გავასაჯაროვეთ, იმიტომ, რომ საზოგადოებას აინტერსებდა თუ რასთან ჰქონდა საქმე. დღეს კიდევ ერთხელ დადასტურდა ეს გარიგებები და ფაქტები და იმედი მაქვს, რომ გამოძიება ალბათ, საბოლოო პასუხს გასცემს, თუმცა, ამის იმედი მე ნაკლებად მაქვს,“ -  განაცხადა ლაშა თორდიამ. 

12 მაისს სახელმწიფო აუდიტის სამსახურის ხელმძღვანელ ლაშა თორდიას და ყოფილ მთავარ პროკურორ ოთარ ფარცხალაძეს შორის ინციდენტი მოხდა.

ლაშა თორდიას მტკიცებით, მას თავს ოთარ ფარცხალაძე და მისი თანმხლები რამდენიმე პირი დაესხნენ. სახელმწიფო აუდიტის სამსახურის ხელმძღვანელი მომხდარს მის მიერ სამსახურებრივი მოვალეობის შესრულებას უკავშირებს.

ლაშა თორდია აუდიტის გენერალურ აუდიტორად 2012 წლის 25 ივლისს დაინიშნა, ხოლო გენერალურ აუდიტორად მუშაობის უფლებამოსილების ვადა 2017 წელს ამოეწურა.