სითი პარკის გენერალურმა დირექტორმა საგანგებო ბრიფინგი გამართა

სითი პარკი თბილისის მერიის მხრიდან უცხოელი ინვესტორის მიმართ არაკანონიერ დამოკიდებულებაზე საუბრობს. საგანგებო ბრიფინგი კომპანიის გენერალურმა დირექტორმა ბინიამინ ლაჰავმა გამართა.

"თბილისის მერმა კახა კალაძემ ტელევიზიით განაცხადა, რომ თბილისის მერიამ ცალმხრივად შეწყვიტა კონტრაქტი შ.პ.ს. სითი პარკთან. გასაგებია, რომ ეს გადაწყვეტილება შესაძლოა სასიხარულო ყოფილიყო იმ მოქალაქეებისთვის, ვინც ერთხელ მაინც დაჯარიმებულა. თუმცა ყველა ევროპულ ქვეყანაში საჯარო მოხელეები პირველ რიგში პატივს სცემენ კანონმდებლობას და საკითხებს უდგებიან სამართლებრივად, თუმცა ჩვენს შემთხვევაში ეს ასე არ ყოფილა. 

უცხოელი ინვესტორის მიმართ გამოიყენეს არაკეთილსინდისიერი გზები, კომპანია არის პოლიტიკური გადაწყვეტილების მსხვერპლი და ამის ნათელია დადასტურებაა კონტრაქტის ყოვლად უსაფუძვლო შეწყვეტა, ვიმედოვნებ ქართული სასამართლო მიიღებს სამართლიან გადაწყვეტილებას, წინააღმდეგ შემთხვევაში დარწმუნებული ვარ, რომ არცერთი საერთაშორისო სასამართლო არ მოიწონებს უცხოელი ინვესტორისათვის კონტრაქტის შეწყვეტის ფაქტს ასეთი არასამართლიანი საფუძვლებით", - განაცხადა მან. 

მისივე თქმით, მერმა აღნიშნა, რომ სითი პარკის მიერ გამოწერილი ჯარიმების 99% გაუქმდა, მაშინ როდესაც ეს ინფორმაცია მცდარი იყო. წინა წლის განმავლობაში, სითი პარკმა გამოწერა 807 000 ჯარიმა და მათგან მხოლოდ 0,01% (95 ჯარიმა) გააუქმა მერიამ.

ბინიამინ ლაჰავმა დასძინა, რომ კალაძის განცხადებამ გავლენა იქონია სამუშაო პროცესზე და ინსპექტორების უსაფრთხოებაზე.

"მოგიწოდებთ გააკეთოთ მკაფიო განცხადება, რათა უზრუნველყოთ ინსპექტორების უსაფრთხოება რომლებიც ასრულებენ მათზე დაკისრებულ მოვალეობას კანონის სრული დაცვით და საპასუხოდ იღებენ დაუმსახურებელ აგრესიას. კიდევ ერთხელ მინდა ხაზგასმით ავღნიშნო რომ სითი პარკმა უკვე დაიწყო სამართლებრივი პროცედურები და დარწმუნებულები ვართ რომ სამართლიანი სასამართლოს ფარგლებში ცვენს სიმართლეს დავამტკიცებთ როგორც ადგილობრივ ისე საერთაშორისო დონეზე", - განაცხადა სითი პარკის გენერალურმა დირექტორმა.

თბილისის მერიისა და კომპანია „სითი პარკის“ წარმომადგენლებს შორის დღეს შეხვედრა გაიმართება. ცნობილია, რომ მოლაპარაკება 14:00 საათზე დაიწყება.

თბილისის მერია 2018 წლის 10 აპრილიდან სითი პარკთან კონტრაქტს წყვეტს. ამის შესახებ კალაძემ ბრიფინგზე განაცხადა.  სითი პარკთან ხელშეკრულების გაწყვეტის გამო მერია პირგასამტეხლოს არ გადაიხდის. 

კომპანია "სითი პარკმა" განაცხადა, რომ თბილისის მერიის გადაწყვეტილება პოლიტიკურად მოტივირებულია. კომპანიაში აცხადებენ, რომ ისინი თავიანთ უფლებებს სამართლებრივი გზით დაიცავენ. 

ისრაელი-საქართველოს ბიზნეს პალატის ხელმძღვანელმა იციკ მოშემ განაცხადა, რომ  სითი პარკის საქმეს საქართველოსა და ისრაელში არასასიამოვნო ეფექტი ექნება.

ამ განცხადებას კალაძე გამოეხმაურა და თქვა, რომ საქართველოსა და ისრაელს შორის არსებულ ურთიერთობებს ვერავინ და ვერაფერი შეაფერხებს.

კომპანია "სითი პარკსა" და თბილისის მერიას შორის ხელშეკრულება 2007 წელს გაფორმდა და ის ძალაში 2024 წლის 31 დეკემბრამდე უნდა ყოფილიყო.