ალექსანდრე ბარამიძე: ნარკოტიკების ჩადების პრობლემა არსებობს

იუსტიციის მინისტრის მოადგილის ალექსანდრე ბარამიძის შეფასებით, ქვეყანაში ნარკოტიკების ჩადების პრაქტიკა მოქმედებს. ამის შესახებ ბარამიძემ ჯანდაცვის კომიტეტის სხდომაზე განაცხადა, სადაც დამოუკიდებელი საგამოძიებო უწყების შექმნის შესახებ მსჯელობენ.

"კიდევ ერთხელ უნდა ვთქვათ, რომ ჩვენ ვალდებულება გვაქვს აღებული მხოლოდ არასათანადო მოპყრობის და წამების გმოძიებასთან დაკავშირებით თუ ის ჩადეილია სამართალდამცავი წარმომადგენლის მიერ. მეორე, მთლიანობაში რომ ავიღოთ ის დანაშაულები, რომლებზეც გავრცელდება ეს (ინსპექტორის სამსახურის უფლებამოსილება), ამის ქვემდებარობა არის წელიწადში 500-600 ფაქტი.. ამის მიღმა ჩვენ რომ დავამატოთ ე.წ. „ჩადებების“ საკითხი, ნარკოდანაშაულები, რომელთა რაოდენობა რამდენიმე ათასია წელიწადში, ჩვენ დავტვირთავდით (დამოუკიდებელ საგამოძიებო მექანიზმს) და არ უნდა შეგვეპაროს ეჭვი იმაში რომ თუ კი ე.წ. ჩადებებზეც გავავრცელებდით დამოუკიდებელ საგამოძიებო მექანიზმს, ნებისმიერი ნარკობარიგა და ნებისმიერი პირი, რომელიც შესაბამისი ბრალდებით იქნა დაკავებული, იმ წუთშივე იტყვის, რომ "მე ნარკოტიკი „ჩამიდეს“... ალტერნატიული შსს ჩვენ არ გვჭირდება. თუმცა არსებულ სამართალდამცავ სტრუქტურებს რეფორმირება სჭირდება და ეს სავსებით ცხადად ითქვა შინაგან საქმეთა სამინისტროს ახალი ხელმძღვანელობის მიერ, როდესაც ისინი მოვიდნენ ამ სამინისტროს სათავეში ორი-სამი თვის წინ. აქედან გამომდინარე, თუ ჩადებების პრობლემა არსებობს და არსებობს, და ამის დამალვა შეუძლებელია, ეს ყველაფერი სხვა რეფორმის და სხვა სისტემის წიაღში უნდა მოგვარდეს და არა დამოუკიდებელი საგამოძიებო მექანიზმის წიაღში", - განაცხადა ალექსანდრე ბარამიძემ.

მთავრობის ინიციატივით, სახელმწიფო ისპექტორის სამსახურის შესახებ, პერსონალურ მონაცემთა და პროკურატურის შესახებ კანონებში შედის ცვლილებები.

"ცვლილებების მიხედვით, ჩვენ ფუნქციებს არ ვართმევთ პერსონალურ მონაცემთა დაცვის ინსპექტორს, ამ იმსტიტუტს საერთოდ ვაუქმებთ. იგივე საქმეს სახელმწიფო ინპექტორი გააკეთებს. პერსონალურ მონაცემთა დაცვის ინსპექტორის აპარატის დაფინანსებისთვის ბიუჯეტიდან 2 მილიონი იხარჯება, ცალკე ინსტიტუტის შექმნა ხარჯებს გაზრდიდა, სადაც ოპტიზაცია შეიძლება რატომაც არა, ამას გავაკეთებთ” - განაცხადა ალექსანდრე ბარამიძემ.

დღეს ცნობილი გახდა, რომ იუსტიციის სამინისტრო ნარკოპოლიტიკის ალტენატიულ კანონპროექტს წარადგენს, თუმცა ამ კანონპროექტს უკვე აკრიტიკებენ. უწყებათშორისი საბჭოს წევრებმა imedinews-ს უთხრეს, რომ იუსტიციის სამინისტროს მიერ მომზადებული კანონპროექტის მიხედვით,  1 გრამი MDMA ისევ განსაკუთრებით დიდ ოდენობად მიიჩნევა, სასჯელი კი 6-დან 11 წლამდე განისაზღვრება. ნარკოლოგი დავით ოთიაშვილი აცხადებს, რომ ეს პროექტი არსებულ რეპრესიულ ნარკოპოლიტიკას ვერ გააუმჯობესებს.

5 მარტს ნარკოპოლიტიკის შესახებ კანონპროექტის განხილვა ორი თვით გადავადდა. 

სახელმწიფო ინსპექტორის სამსახურზე კანონს ოპოზიცია მხარს არ უჭერს. 

ახალი დამოუკიდებელი საგამოძიებო მექანიზმის შექმნასთან დაკავშირებით იუსტიციის სამინისტრომ უწყებათაშორის კომისიაზე საკანონმდებლო ინიციატივა 31 იანვარს წარადგინა. 

სახელმწიფო ინსპექტორის სამსახური 2019 წლის 1 იანვრიდან შეიქმნება.