„რატომ უყვირის ვიცემერი ბიბლიოთეკების თანამშრომლებს?!“ - თბილისის მერია ქსელში გავრცელებულ ვიდეოზე კომენტარს აკეთებს

ქსელში თბილისის კულტურის სამსახურის უფროსის ბიბლიოთეკების წარმომომადგენლებთან შეხვედრის ვიდეო გავრცელდა. 

„რატომ უყვირის ვიცე-მერი ბიბლიოთეკების თანამშრომლებს?!“- ამ კითხვით მიმართავს მომხმარებელი თეონა ჭალიძე თბილისის მერიას და ვიდეოსთან ერთად ბიბლიოთეკარების განცხადებას აქვეყნებს.

,,სოფო ხუნწარია ცინიკურად დაგვცინის, ტელეეკრანიდან აცხადებს, რომ ტრენინგი სამდღიანია და ეს საკითხები ისედაც უნდა იცოდნენო. მინდა ვკითხო სოფო ხუნწარიას, საბიბლიოთეკო კანონის ცოდნა ნიშნავს ბიბლიოთეკის მართვას? (კანონს, რომელსაც შევარდნაძე აწერს ხელს და შესაცვლელია) ან რატომ ჰგონია, რომ ეს არ ვიცით? გამოცდებს იმიტომ მოითხოვს დაჟინებით, რომ ხალხის გაშვება უნდა ქუჩაში. ამბობენ, რომ თავის დაქალი უნდა იყოს ა(ა)იპის დირექტორადო. თუკი სოფო ხუნწარიას სურს რეორგანიზაციაში დავეხმაროთ, მაშინ სპეციალისტებს უნდა მოგვისმინოს" - ნათქვამია ბიბლიოთეკარების განცხადებაში“.

imedinews-ი კომენტარისთვის თბილისის მერიის პრესსამსახურს დაუკავშირდა:

„გიდასტურებთ, რომ ნამდილად შედგა შეხვედრა ბიბლიოთეკარებთან, რომელიც მერის მოადგილის სოფიო ხუნწარიას ინიციატივით უკვე მესამედ ჩატარდა. აღნიშნული შეხვედრა წარიმართა ცხარე დისკუსიის რეჟიმში. შევხვედრის მიზანი იყო ის, რომ მერიას ბიბლიოთეკარებთან ერთად კიდევ ერთხელ გაევლო ყველა დეტალი, რომელიც შეეხება საბიბლიოთეკო რეფორმას და გაეგო ინფორმაცია, თუ როგორ მიმდინარეობს ტექსტირებისთვის მზადების პროცესი. სამწუხაროდ ერთ-ერთი ბიბლიოთეკარი მთელი შეხვედრის განმავლობაში არ აძლევდა საშუალებას სოფიო ხუნწარიას განემარტა დეტალები და ცდილობდა არეულობის შეტანას. შესაბამისად, მერის მოადგილე ხმის გამაძლიერებლის საშუალებით შეეცადა საკუთარი სათქმელის ჩამოყალიბებას. ჩანაწერში გარკვევით ისმის მისი თხოვნა, რომ მისცემოდა საშუალება ბოლომდე ეთქვა სათქმელი. კიდევ ერთხელ ვუსვამთ ხაზს იმ ფაქტს, რომ ადგილი ჰქონდა არა ყვირილს, არამედ ცხარე დისკუსიას.", - განაცხადეს თბილისის მერიაში.

ბიბლიოთკების რეფორმის შესახებ ცნობილი 22 თებერვალს, თბილისის მთავრობის სხდომაზე გახდა ცნობილი. რეფორმის შესახებ სოფო ხუნწარიამ ვრცლად „მაესტროს“ ეთერში ილაპარაკა.

6 მარტს თბილისის საკრებულოზე ბიბლიოთეკების გაერთიანების საკითხს მხარი 32-მა დეპუტატმა დაუჭირა, ერთი კი წინააღმდეგ წავიდა. შედეგად, ბიბლიოთეკებისა და მედიათეკების გაერთიანების შედეგად შეიქმნება ახალი ააიპ-ი, სადაც ბიბლიოთეკარები საგამოცდო ტესტირების შედეგად დაინიშნებიან. 

24 მარტს ცნობილი გახდა, რომ ბიბლიოთეკარების ტესტირება ერთი თვით გადაიდო. ტესტირება 29 აპრილს იყო დაგეგმილი. თავის მხრივ, ბიბლიოთეკარები მერიას გამოცდის არა 1, არამედ 8 თვით გადავადებას სთხოვენ.