მეტროს მემანქანეებსა და თბილისის მერიას შორის მოლაპარაკებები დღესაც გაიმართება

მეტროს გაფიცული მემანქანეები აცხადებენ, რომ დედაქალაქის მთავრობასთან მოლაპარაკებები დღეს გაგრძელდება. ამის შესახებ 1tv-ი წერს.

ერთ-ერთი მემანქანე რატი კაპანაძე აცხადებს, რომ თბილისის მერთან კახა კალაძესთან შეხვედრას დადებითად აფასებენ.

„მერის აქ მოსვლა არის დადებითი ნაბიჯი, რადგანაც დაიწყო მოლაპარაკებების ეტაპი. საბედნიეროდ, გაიმართა ეს შეხვედრა ჩვენსა და კახა კალაძეს შორის, მაგრამ სამწუხაროდ, არ იყო ის კონკრეტიკა, რაც დააკმაყოფილებდა გაფიცულ ადამიანებს. ვიმედოვნებთ, რომ ეს მოლაპარაკებები დღესაც გაგრძელდება და კონკრეტულ დადებით შედეგამდე მივალთ. ჩვენ ვფიქრობთ, რომ დღეს გაგრძელდება შეხვედრები მოლაპარაკების მაგიდასთან, დადებითად და ლოგიკურ დასკვნამდე მივა ეს ყველაფერი. ჩვენ გვჭირდება უფრო მეტი კონკრეტიკა და გამოკვეთილი დეტალები ამ საკითხთან დაკავშირებით“, – განაცხადა მემანქანე რატი კაპანაძემ.

წუხელ მეტროს მემანქანეებმა გლდანის დეპოს ტერიტორიაზე თბილისის მერთან შეხვედრა პროტესტის ნიშნად დატოვეს. მათი თქმით, კახა კალაძემ პოზიცია არ შეცვალა და მხოლოდ იმას შეჰპირდა, რომ მათი მოთხოვნების განხილვას 2019 წლიდან დაიწყებდა, მიზეზად კი ბიუჯეტში საკმარისი თანხის არარსებობა დაასახელა. 

ამ დროისთვის კი გლდანის დეპოსთან აქცია კვლავ მიმდინარეობს. მემანქანეები მესამე დღეა, შიმშილობენ. აქციის მონაწილეების თქმით, აქციები გაგრძელდება, სანამ მათი მოთხოვნები არ შესრულდება.

მეტროს მემანქანეები 4 ივნისის დილიდან გაიფიცნენ, რის გამოც ამ დროისთვის ყველა მეტროსადგური გაჩერებულია. მეტროსადგურების მუშაობის აღდგენამდე ავტობუსებით მგზავრობა უფასო იქნება.

2018 წლის 21 მაისს თბილისის საქალაქო სასამართლომ, მეტროს თანამშრომლების გაფიცვის უფლება განუსაზღვრელი ვადით შეზღუდა. მოსამართლის გადაწყვეტილებით, პროფესიულ გაერთიანების წევრებს მეტროს მემანქანეების გაფიცვაში მონაწილეობა „სამუშაო საათების განმავლობაში“ აეკრძალათ. 

31 მაისს პროფკავშირების გაერთიანებამ თბილისის საქალაქო სასამართლოს მიერ გაფიცვის უფლების შეზღუდვა საკონსტიტუციო სასამართლოში გაასაჩივრა.

თბილისის მეტროპოლიტენის მემანქანეები საათობრივი ანაზღაურების გაზრდას 2 აპრილიდან ითხოვენ. თბილისის მერმა არაერთხელ განაცხადა, რომ მეტროპოლიტენის მემანქანეებს ხელფასს ვერ გაუზრდის.

4 ივნისს, კახა კალაძემ მეტროს მემანქანეების ხელფასი გაასაჯაროვა და აღნიშნა, რომ მათი ანაზღაურება პატრულის, მაშველის, მეხანძრის, სასწრაფო ბრიგადის თანამშრომლის ხელფასებს აღემატება.