თბილისის მეტრო დღესაც არ იმუშავებს

მეტროს მემანქანეებმა გლდანის დეპოს ტერიტორიაზე თბილისის მერთან შეხვედრა პროტესტის ნიშნად დატოვეს. მათი თქმით, კახა კალაძემ პოზიცია არ შეცვალა და მხოლოდ იმას შეჰპირდა, რომ მათი მოთხოვნების განხილვას 2019 წლიდან დაიწყებდა, მიზეზად კი ბიუჯეტში საკმარისი თანხის არარსებობა დაასახელა. მემანქანეები გაფიცვას განაგრძობენ, შესაბამისად დედაქალაქის მეტრო დღესაც არ იმუშავებს.

გლდანის დეპოს ტერიტორია თბილისის მერმაც დატოვა.

„მემანქანეებს არსებული მდგომარეობა ავუხსენით როგორც მერიაში, ისე კომპანიაში. მათ კიდევ ერთხელ გვითხრეს თავიანთი გასაჭირი და პრობლემები. ყველაფერი დეტალურად გავიარეთ და იმედია, უახლოეს ხანებში მოხდება შეჯერება და მეტრო გაიხსნება. ჩვენ ავუხსენით ის, თუ როგორია ფინანსური მდგომარეობა", - განაცხადა კალაძემ მემანქანეებთან შეხვედრის შემდეგ.

მანამდეც, მეტროს მემანქანეებს და კახა კალაძეს შორის შეხვედრა თბილისის მერიის შენობაში უშედეგოდ დასრულდა, რის შემდეგაც დედაქალაქის მერი გლდანის დეპოსთან გაფიცული მემანქანეების აქციაზე მივიდა.

მეტროს მემანქანეები 4 ივნისის დილიდან გაიფიცნენ, რის გამოც ამ დროისთვის ყველა მეტროსადგური გაჩერებულია. მეტროსადგურების მუშაობის აღდგენამდე ავტობუსებით მგზავრობა უფასო იქნება.

2018 წლის 21 მაისს თბილისის საქალაქო სასამართლომ, მეტროს თანამშრომლების გაფიცვის უფლება განუსაზღვრელი ვადით შეზღუდა. მოსამართლის გადაწყვეტილებით, პროფესიულ გაერთიანების წევრებს მეტროს მემანქანეების გაფიცვაში მონაწილეობა „სამუშაო საათების განმავლობაში“ აეკრძალათ. 

31 მაისს პროფკავშირების გაერთიანებამ თბილისის საქალაქო სასამართლოს მიერ გაფიცვის უფლების შეზღუდვა საკონსტიტუციო სასამართლოში გაასაჩივრა.

თბილისის მეტროპოლიტენის მემანქანეები საათობრივი ანაზღაურების გაზრდას 2 აპრილიდან ითხოვენ. თბილისის მერმა არაერთხელ განაცხადა, რომ მეტროპოლიტენის მემანქანეებს ხელფასს ვერ გაუზრდის.

4 ივნისს, კახა კალაძემ მეტროს მემანქანეების ხელფასი გაასაჯაროვა და აღნიშნა, რომ მათი ანაზღაურება პატრულის, მაშველის, მეხანძრის, სასწრაფო ბრიგადის თანამშრომლის ხელფასებს აღემატება.