გიგი უგულავას ბანერის დაზიანების ფაქტზე გამოძიება დაიწყო

ვანში, „ევროპული საქართველოს“ მაჟორიტარი დეპუტატობის კანდიდატის, გიგი უგულავას საარჩევნო ბანერის დაზიანების ფაქტზე შინაგან საქმეთა სამინისტრომ გამოძიება დაიწყო. ინფორმაციას 1tv ავრცელებს.

„მომხდარის შესახებ შინაგან საქმეთა სამინისტროში შემოვიდა შეტყობინება. შეტყობინების მიღებისთანავე, დაიწყო გამოძიება სისხლის სამართლის კოდექსის 187-ე მუხლით, რაც გულისხმობს ნივთის დაზიანებას ან განადგურებას და ისჯება თავისუფლების აღკვეთით, ვადით ერთიდან სამ წლამდე. აღნიშნულ ფაქტზე მიმდინარეობს ინტენსიური საგამოძიებო მოქმედებები“, – აცხადებენ შინაგან საქმეთა სამინისტროში.

გიგი უგულავას ბანერზე ვანში კანდიდატის გამოსახულებას თავი აქვს ამოჭრილი. ამის შესახებ დღეს, დილით გახდა ცნობილი.

დღეს საქართველოს პარლამენტის 2016 წლის 8 ოქტომბრის არჩევნების შუალედური არჩევნები იმართება №54-ე მაჟორიტარულ საარჩევნო ოლქში, რომელიც ვანისა და ხონის მუნიციპალიტეტების სამოქმედო ტერიტორიას მოიცავს. 

ვანსა და ხონში შუალედური არჩევნების ჩატარება მას შემდეგ გახდა საჭირო, რაც დეკემბერში ამ ოლქის მაჟორიტარმა დეპუტატმა გიორგი ლილუაშვილმა პარლამენტის თვითმმართველობის კომიტეტის თავმჯდომარის პოსტი დატოვა და საქმიანობა სახელმწიფო უსაფრთხოების სამსახურის ხელმძღვანელის მოადგილედ განაგრძო.