პრემიერი: კატეგორიულად მიუღებელია დაპირისპირება და საზოგადოების გახლეჩა

პრემიერმინისტრმა მთავრობის ადმინისტრაციაში საგანგებო ბრიფინგი გამართა. გიორგი კვირიკაშვილი ბოლო 2 დღის განმავლობაში განვითარებულ მოვლენებს გამოეხმაურა.

გიორგი კვირიკაშვილმა აქციის მონაწილეებს მიმართა. მისი თქმით, ის იქნება გარანტი, რომ რომ მათ სიტყვისა და გამოხატვის თავისუფლებას არაფერი დაემუქრება.

პრემიერმა კიდევ ერთხელ დაადასტურა, რომ ნარკორეალიზატორების მიმართ პოზიცია მკაცრი იქნება, განსახვავებით მომხარებლებისგან.

"ის, რომ სახელმწიფოს ნარკორეალიზატორების მიმართ მკაცრი პოზიცია ექნება და გაცილებით ჰუმანური იქნება მომხმარებლების მიმართ, არა ერთხელ მაქვს ნათქვამი და კიდევ ვადასტურებ. ჩემო შვილებო, ჩემო მეგობრებო, ჩვენო ახალგაზრდებო. თქვენ ხართ მომავალი თაობა, ჩვენი ქვეყნის ხვალინდელი დღე. მე პირადად ვარ იმის გარანტი, რომ თქვენი სიტყვისა და გამოხატვის თავისუფლებას არაფერი დაემუქრება. სწორედ ეს არის ერთერთი იმ უდიდესი მონავაპოვართანაგი, რითიც ჩვენი ხელისუფლება ამაყობს და ეს თითოეული თქვენგანის მონაპოვარიც არის. ის, რომ გამოხატვის თავისუფლების უზრუნველყოფა ჩვენი პრიორიტეტია, გასული საათების განმავლობაშიც დადასტურდა. პოლიცია და სამართალდამცავები ყველაფერს აკეთებენ, რათა თქვენი აზრი დააფიქსიროთ. კატეგორიულად მიუღებელი და დაუშვებელია რაიმე სახის დაპირისპირება და საზოგადოების გახლეჩვის მცდელობა. მოვუწოდებ სამართალმდაცვა ორგანოებს, მაქსიმალურად გააძლიერონ უსაფრთხოების ზომები შესაძლო დაპირისპრების პრევენციის მიზნით. ნებისმიერ ადამიანს აქვს უფლება გამოხატოს თავისი აზრი, მაგრამ აზრის გამოხატვისას დაპირისპირება ყოვლად დაუშვებელია. ნუ დავუშვებთ, სიძულვილს განსხვავებული მოსაზრებების გამო. გავერთიანდეს ადამიანების სიცოცხლის და ჩვენი ქვეყნის მომავლის დასაცავად"-განაცხადა პრემიერმა

თბილისში, პარლამენტის შენობის წინ მეორე დღეა თეთრი ხმაურის მოძრაობა საპროტესტო აქციას მართავს, რომელიც კლუბებში „ბასიანსა" და „გალერიში" ჩატარებულ სპეცოპერაციას უკავშირდება, რა დროსაც შსს-ს ცნობით, 8 ნარკორეალიზატორი დააკავეს. რუსთაველზე შეკრებილი აქციის წევრები, სპეცრაზმელების მხრიდან აგრესიულ მოპყრობას აპროტესტებენ და ითხოვენ, რომ მომხდარზე განმარტება პრემიერმინისტრმა გიორგი კვირიკაშვილმა გააკეთოს.

დღეს თხმ-ის შეკრების კონტრაქციებიც გაიმართა. ერთ-ერთი კონტრაქციის ორგანიზატორი გიორგი გაბედავა კი ცოტა ხნის წინ, პოლიციისთვის წინააღმდეგობის გაწევის გამო დააკავეს.

ბოლო პერიოდში, საქართველოში ალაპარაკდნენ ახალი ნარკოტიკის შესახებ, რომელმაც, არსებული ინფორმაციით, უკვე რამდენიმე ადამიანის, მათ შორის ახალგაზრდების სიცოცხლე იმსხვერპლა.