თალაკვაძე: არასამთავრობოები თეა წულუკიანის გადადგომას მიზანმიმართულად ითხოვენ

„როდესაც ვსაუბრობთ თეა წულუკიანის გადადგომაზე, პირდაპირ უნდა ითქვას რომ მთავარი პროკურორის შერჩევის პროცესში მონაწილეობს არა მხოლოდ მინისტრი და იუსტიციის სამინისტრო, არამედ მონაწილეობს საპროკურორო საბჭო, სამოქალაქო საზოგადოება საქართველოს მთავრობა და პარლამენტი. არასამთავრობო ორგანიზაციებმა ძალიან კარგად იციან, რომ პროკურორის შერჩევის პროცესი არის კანონმდებლობით დარეგულირებული“, - ამის შესახებ გადაცემაში „პირისპირ“ საპარლამენტო უმრავლესობის ლიდერმა არჩილ თალაკვაძემ განაცხადა. 

მისი თქმით, არასამთავრობოები და ოპოზიცია წულუკიანის გადადგომას მიზანმიმართულად ითხოვენ. 

„რა უნდა ვიფიქროთ ამის შემდეგ? უნდა ვიფიქროთ ის, რომ ამ ადამიანებს მიზანმიმართულად აქვთ ჩამოყალიბებული მიზანი და ამოცანა, რომ მას შემდეგ, რაც  ქუჩაში აქციები ჩაატარეს და მთავარი მოთხოვნა იყო ხელისუფლების ჩამოშლა და სისტემის დანგრევა, დღეს უკვე დაიწყეს საუბარი მინისტრის გადადგომაზე“- განმარტა მან.

თალაკვაძის თქმით, მთავარი პროკურორის თანამდებობაზე კანდიდატის დასახელების პროცესი ღიაა და ნებისმიერს შეუძლია ის დაასახელოს.

მას შემდეგ, რაც მთავარმა პროკურორმა ირაკლი შოთაძემ თანამდებობა დატოვა, ოპოზიციის და არასამთავრობოების ერთი ნაწილი იუსტიციის მინისტრის, თეა წულუკიანის გადადგომასაც ითხოვს.

მთავარი პროკურორის შესარჩევ პროცესთან დაკავშირებით, არასამთავრობო ორგანიზაციებმა პრესკონფერენცია გამართეს, რომელზეც განაცხადეს, რომ პროცესში არ ჩაერთვებიან. 

იუსტიციის მინისტრმა, საპროკურორო საბჭოს თავმჯდომარემ, თეა წულუკიანმა მთავარი პროკურორის შესარჩევად საჯარო კონსულტაციები  4 ივნისს დაიწყო. კონსულტაციებში მონაწილეობისთვის წერილი დაეგზავნათ ორგანიზაციების ხელმძღვანელებსა და უმაღლესი სასწავლებლების რექტორებს.