პრეზიდენტს იუსტიციის მინისტრთან პრეტენზიები და შენიშვნები აქვს

გიორგი მარგველაშვილს იუსტიციის მინისტრთან პრეტენზიები და შენიშვნები აქვს. ამის შესახებ პრეზიდენტის საპარლამენტო მდივანმა ილაპარაკა. ანა ნაცვლიშვილის განცხადებით, გიორგი მარგველაშვილმა თეა წულუკიანის მინისტრობის პერიოდში სასამართლო სისტემაში გატარებული რეფორმები კიდევ ერთხელ გააკრიტიკა. 

ნაცვლიშვილი ფიქრობს, რომ თეა წულუკიანი არ იყო ეფექტიანი მინისტრი და ვერ შეძლო ქვეყანაში სამართლებრივი რეფორმების გატარება.

„მის მიმართ არსებობს ძალიან ბევრი დასაბუთებული პრეტენზია საზოგადოების სხვადასხვა ჯგუფში. ბოლო დროს განვითარებულმა მოვლენებმა განსაკუთრებით ნათლად გამოაჩინა, რომ მართლმსაჯულების სისტემა შეიძლება ითქვას, საქართველოში ვერ შედგა, ვერ აშენდა, საბაზისო, ფუნდამენტური საკითხები, ჯერ კიდევ კითხვის ნიშნის ქვეშ დგას და თავიდან არის დასაწყები ამ სისტემების შექმნა,“ - განაცხადა ნაცვლიშვილმა.

ანა ნაცვლიშვილის თქმით, ახალმა პრემიერმა და მთავრობამ თვალი უნდა გაუსწორონ ამ პრობლემას და არსებული ხარვეზებიდან გამომდინარე, თეა წულუკიანი სამთავრობო გუნდში აღარ უნდა იყოს.

პრემიერობის კანდიდატმა მამუკა ბახტაძემ პარლამენტის წინაშე საკუთარი გუნდი უნდა წარადგინოს. მთავარი ინტრიგა სწორედ ახალი მინისტრთა კაბინეტია - ვინ წავა და ვინ შეინარჩუნებს თანამდებობას. თეა წულუკიანი შესაძლოა მთავრობის ახალ შემადგენლობაში დარჩეს.

იუსტიციის მინისტრმა თეა წულუკიანმა ხორავას ქუჩაზე მომხდარი მკვლელობის გამოძიების, პროკურატურის მუშაობისა და თანამდებობის დატოვების შესაძლებლობის შესახებ ტელეკომპანია „იმედთან“ ინტერვიუში ილაპარაკა. მან გიორგი მარგველაშვილის პრეტენზიებსაც უპასუხა, ასევე არასამთავრობოთა ნაწილს, რომელმაც მისი გადადგომის მოთხოვნით 8 ივნისს იუსტიციის სახლთან აქცია-პერფორმანსი მოაწყო.

31 მაისს, ხორავას ქუჩის მკვლელობის საქმეზე პირველი ინსტანციის სასამართლომ განაჩენი გამოაცხადა. სასამართლომ პროკურატურის პოზიცია სრულად არ გაითვალისწინა და ბრალდებულების მიმართ განსხვავებული განაჩენი გამოიტანა. ერთ-ერთი მოკლული მოზარდის მამამ, ზაზა სარალიძემ საპროტესტო აქციები დაანონსა. ამავე დღეს მთავარი პროკურორი ირაკლი შოთაძე თანამდებობიდან გადადგა.

ახალი პროკურორის შესარჩევ პროცესში მონაწილეობაზე არასამთავრობო ორგანიზაციების ნაწილი უარს აცხადებს. იუსტიციის მინისტრმა და საპროკურორო საბჭოს თავმჯდომარე თეა წულუკიანმა მთავარი პროკურორის შესარჩევად საჯარო კონსულტაციები 4 ივნისს დაიწყო.