წულუკიანი: სჯობდა კობახიძე ადრე გადამდგარიყო

ახალგაზრდების პროტესტი გულწრფელია და პარლამენტში მომხდარი ამბავი აღმაშფოთებელი იყო, - განაცხადა იუსტიციის მინისტრმა თეა წულუკიანმა 20 ივნისის მოვლენების შეფასებისას.  

თუმცა თეა წულუკიანი აღნიშნავს, რომ აპროტესტებდე პარლამენტის დარბაზში გავრილოვის გამოსვლას და შემდეგ პარლამენტზე მიგქონდეს შტურმი, ალბათ არავითარ შესაბამისობაში არ მოდის.

„ოკუპანტი ქვეყნის მოქალაქე არ უნდა ყოფილიყო იქ, სადაც იყო - ამას ვამბობ ძალიან რბილად. ამისთვის გადადგა ქვეყანაში რიგით მეორე პირი, სჯობდა უფრო ადრე, მაგრამ გადადგა“, - განაცხადა თეა წულუკიანმა.

მისივე თქმით, ვიღაცებს აწყობთ, რომ ხელისუფლება მოირღვეს და დაბრუნდნენ ხელისუფლებაში, რისთვისაც მიმართავენ ყველანაირი პროტესტის, მათ შორის ახალგაზრდების პროტესტის გამოყენებას.

„შესაბამისად, უნდა ვიფიქროთ, როგორ წავა ეს მდგომარეობა სიმშვიდისკენ, რადგან პასუხისმგებლობები ყველას აქვს აღებული. ჩვენ ყველას გვაქვს ძალიან მნიშვნელოვანი პასუხისმგებლობა, რომ ქვეყანა მშვიდობიანად, სტაბილურად მივიდეს არჩევნებამდე და თუ ამ არჩევნების შედეგად დაბრუნდება ხელისუფლებაში „ნაციონალური მოძრაობა“ ან რომელიმე მისი დანაყოფი, ამაში პრობლემას ვერ დავინახავთ. 

ამიტომ, მათ მოუწევთ დაელოდონ არჩევნებს და ის გადაწყვეტს, ვინ დარჩეს ხელისუფლებაში და ვინ წავიდეს, იყოს კოალიციური თუ არა. რაც შეეხება ჩვენი ხელისუფლების მორალურ მხარეს, რომელზეც ოპონენტები ამბობენ, რომ დაკარგა, მე გეტყვით - რა თქმა უნდა, კარგი იქნებოდა, ეს არ მომხდარიყო, სჯობდა, რომ პარლამენტს, ორგანიზატორებს გამოეჩინათ უფრო მაღალი პასუხისმგებლობის, ყურადღების ხარისხი, მაგრამ ჩვენ გვაქვს პასუხისმგებლობა, რომ ამას არ გადაჰყვეს დანარჩენი. უნდა მივცეთ გზა გამოძიებას.

სიმშვიდის დროა. რა თქმა უნდა, ახალგაზრდების პროტესტი გულწრფელია და პარლამენტში მომხდარი ამბავი აღმაშფოთებელი იყო. მაგრამ აპროტესტებდე პარლამენტის დარბაზში გავრილოვის გამოსვლას და შემდეგ პარლამენტზე მიგქონდეს შტურმი, ეს ალბათ არავითარ შესაბამისობაში არ მოდის“, - აღნიშნა თეა წულუკიანმა მთავრობის სხდომის დასრულების შემდეგ.   

აქციის მონაწილეების მთავარ მოთხოვნად რჩება შს მინისტრის გიორგი გახარიას გადადგომა, რადგან პროპორციული არჩევნებისა და აქციის დაშლისას დაკავებულთა გათავისუფლების შესახებ მოთხოვნა დაკმაყოფილებულია.

აქცია პარლამენტის წინ დღეს ისევ 19:00 საათზე განახლდება. პროტესტის მონაწილეებმა მმართველი პარტიის ლიდერის ბიძინა ივანიშვილის სახლთან გუშინ წარადგინეს საკუთარი მოთხოვნა, როდესაც რუსთაველის გამზირიდან მსვლელობა სწორედ ამ მიმართულებით მოაწყვეს. 

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები. 

ამას კი წინ უძღოდა პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებისადმი რუსეთის დუმის კომუნისტური პარტიის წევრის სერგეი გავრილოვის მიმართვა, რასაც საკანონმდებლო ორგანოსთან საპროტესტო აქცია მოჰყვა.