ივანიშვილმა კვირიკაშვილის მმართველობის ხარვეზები დაასახელა

ქართული ოცნების თავმჯდომარემ, ბიძინა ივანიშვილმა საზოგადოებრივი მაუწყებლის ეთერში იმ შეხვედრების დეტალები გაიხსენა, რომლის დასრულების შემდეგაც ყოფილმა პრემიერმინისტრმა გიორგი კვირიკაშვილმა გადადგომის შესახებ განცხადება გააკეთა. მანამდე კი მან კვირიკაშვილის მმართველობის ხარვეზები დაასახელა.

„მას აღარ შეეძლო მართვა და ის მეთოდები, რომელსაც კვირიკაშვილი იყენებდა, არ იყო ეფექტური. კვირიკაშვილი ვერ ახერხებდა გუნდურ მმართველობას, რაც აუცილებელია ზოგადად მართვაში... მთავრობაში ვერ ხერხდებოდა პრინციპული საკითხების განხილვა და შეჯერება. ძირითადად ორ კაცთან - ალავიძესთან და ქუმსიშვილთან ახერხებდა ის გადაწყვეტილებების შეთანხმებას. ზოგიერთი დაგვიანებული გადაწყვეტილება მყისიერად შემოდიოდა საზოგადოებაში, გუნდის მზაობა არ შეიმჩნეოდა და მითუმეტეს პარლამენტის. ეს გუნდზეც აისახებოდა. კვირიკაშვილის მმართველობის ეს მეთოდი იყო ერთ-ერთი მიზეზი, რომ გუნდს უკვე დაეტყო, რომ დაშლას იწყებდა.“, - განმარტა პარტიის თავმჯდომარემ..

ივანიშვილი ამბობს, რომ ბიზნესის ლობირება კარგია, მაგრამ პრემიერსაც და მინისტრებსაც არ უნდა დაავიწყდეთ მთავარი ვალდებულება - სახელმწიფოს დაცვა.

შეკითხვები იყო ძალიან მძიმე, საუბარი, ალბათ, სამი საათი გაგრძელდა. კვირიკაშვილი ცდილობდა გამოსვლას და მას ამის საშუალება ჰქონდა, საპირისპირო აზრის გამთქმის. დასასრულს მან კარგად დაინახა, რომ მას აღარ ჰქონდა რესურსი მართვის. აღარ ჰქონდა ნდობა არც პარლამენტში და არც მთავრობაში და სწორედ ეს გახდა მიზეზი მისი გადადგომის“, - განმარტა ივანიშვილმა.

გიორგი კვირიკაშვილი პრემიერმინისტრის თანამდებობიდან 13 ივნისს გადადგა და მიზეზად პარტიის თავმჯდომარე ბიძინა ივანიშვილთან, რიგ ფუნდამენტურ საკითხებზე უთანხმოება დაასახელა. „ქართულმა ოცნებამ“ მთავრობის ახალ ხელმძღვანელად მამუკა ბახტაძე დაასახელა, რომელმაც თავის მხრივ პარლამენტს დასამტკიცებლად კაბინეტის განახლებული შემადგენლობა წარუდგინა. რამდენიმე მინისტრთან ერთად ახალ კაბინეტში აღარ აღმოჩნდა არც ეკონომიკის ყოფილი მინისტრის დიმიტრი ქუმსიშვილის ადგილიც.

მალევე ცნობილი გახდა, რომ დიმიტრი ქუმსიშვილი და ინფრასტრუქტურის ყოფილი მინისტრი ზურაბ ალავიძე პროკურატურაში გამოკითხეს. მოგვიანებით ამ საქმეზე ქვეყნის მთავარმა საგამოძიებო უწყებამ განმარტა, რომ ჯერ კიდევ მარტში მთავარი პროკურატურის საგამოძიებო ნაწილში დაიწყო გამოძიება საქართველოს ეკონომიკისა და მდგრადი განვითარების სამინისტროს, ასევე რეგიონული განვითარებისა და ინფრასტრუქტურის სამინისტროს ცალკეულ მოხელეთა მიერ სამსახურებრივი უფლებამოსილების ბოროტად გამოყენებისა და დიდი ოდენობით საბიუჯეტო თანხების მართლსაწინააღმდეგოდ მითვისება/გაფლანგვის ფაქტებზე.