ცქიტიშვილი: კომისიის ოპოზიციური ნაწილის დასკვნა დიდწილად პოლიტიზებული ბელეტრისტიკაა

საპარლამენტო უმრავლესობის წევრი დიმიტრი ცქიტიშვილი, რომელიც ხორავას ქუჩაზე მომხდარ მკვლელობასთან დაკავშირებით შექმნილი დროებითი საგამოძიებო კომისიის წევრიც არის, ამბობს, რომ შეთქმულების თეორიები, რომელზეც ხორავას ქუჩაზე მომხდარ მკვლელობებთან დაკავშირებით იყო საუბარი, გამოძიების შედეგად არ დადგინდა. მის კომენტარს სააგენტო "ინტერპრესნიუსი" ავრცელებს.

რაც შეეხება გამოძიების მიმდინარეობითი დაინტერესებულ პირებს, რომლის შესახებაც დღეს კომისიის თავმჯდომარემ სერგი კაპანაძემ განაცხადა, ცქიტიშვილი ამბობს, რომ ჰიპოთეტურად, შესაძლოა, დაინტერესებული პირები არსებობდნენ, თუმცა მათი კავშირი გამოძიებასსთან ისეთი, რომ საქმის ვითარება შეცვლილიყო, არ დადგენილა.

"გრაფიკიც კი არ არის შედგენილი ისე, რომ ჩვენ კომისიის სხდომებზე დასწრების საშუალება მოგვეცეს. სამწუხაროდ, ჩვენი ოპონენტები ტყუიან და ამაზე აპირებენ ქულების დაწერას. მათ მიერ ნაწილ-ნაწილ წარმოდგენილ და პერიოდულად განახლებად დასკვნაში არ არის მიზანშედეგობრივი კავშირი. მათ აქვთ აღწერითი ფორმები, რაც ხშირ შემთხვევაში არის ბელეტრისტიკა და მეორე შემთხვევაში, რეკომენდაცები არის თავიანთ პოლიტიკურ დღის წესრიგზე დამყარებული. ჩვენი შეხედულებით უნდა შევაფასოთ ის ინფორმაცია, რაც მივიღეთ, აქედან უნდა გამომდინარეობდეს დასკვნები. ასეთია ჩვენი დასკვნის პროექტი, რომელიც არის ობიექტური, სამართლიანი და თავისუფალი პოლიტიკური პროცესებისგან", - განაცხადა დიმიტრი ცქიტიშვილმა.

კითხვაზე, რატომ არ არის დავით სარალიძის მკვლელი დაკავებული, ცქიტიშვილი აცხადებს, რომ გამოძიების ვერსიით მკვლელი დაკავებულია, თუმცა სასამართლომ მტკიცებულებებები საკმარისად არ მიიჩნია: "კომისიამ ამ კუთხით ახალი ვერაფერი გამოიძია", - თქვა ცქიტიშვილმა.

უმრავლესობის კიდევ ერთი წევრისა ანრი ოხანაშვილის თქმით, რომელიც ასევე კომისიის წევრიც არის, უმცირესობის მიერ მომზადებულ დასკვნას "პოლიტიკური ელფერი აქვს".

„საპარლამენტო უმცირესობის მიერ მომზადებულ დოკუმენტი აბსოლუტურად არაკომპეტენტური და პოლიტიკური ელფერი აქვს მას. შესაბამისად, ჩვენ გვინდოდა შეგვემუშავებინა დოკუმენტი, რომელიც იქნება ობიექტურ რეალობაზე დაფუძნებული და რომელიც სამართლებრივად იქნება დასაბუთებული. რა თქმა უნდა, ჩვენ დავადგინეთ ხარვეზები და ამ ხარვეზებმა იქონია გავლენა მტკიცებულებათა ხარისხზე. ჩვენ კომისიის მუშაობის ფარგლებში გამოვკვეთეთ, რომ არსებობდა კომუნიკაციის პრობლემა შესაბამისი უწყებების მხრიდან საზოგადოებასთან. ჩვენ გვაქვს კონკრეტული მკაცრი რეკომენდაციებიც, რომელთა შესრულებასაც დავავალებთ კონკრეტულ უწყებებს“, - განაცხადა ოხანაშვილმა.

დღეს საგამოძიებო კომისიამ დასკვნის ახალი ნაწილი გაასაჯაროვა. დასკვნაში მირზა სუბელიანის შესახებ არის საუბარი და წერია, რომ სუბელიანის გამოჩენის შემდეგ საქმე ტენდენციურად წარიმართა.

დასკვნის პირველი და მეორე ნაწილი 1 და 2 სექტემბერსაც გასაჯაროვდა. 

პარლამენტში ხორავას ქუჩაზე მოკლული ორი მოზარდის საქმესთან დაკავშირებით პარლამენტის დროებითი საგამოძიებო კომისია 6 ივნისს შეიქმნა. პარლამენტის საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. მკვლელობის საქმეზე ახალი გარემოებების დადგენის მიზნით, გამოძიებას უშუალოდ გიორგი გახარია ხელმძღვანელობს.

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი  გამოაცხადა,  რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

მთავარი პროკურორი ირაკლი შოთაძე, რომლის უწყების პოზიციაც სასამართლომ ბოლომდე არ გაიზიარა,  თანამდებობიდან გადადგა.