ნინო ბურჯანაძე საპრეზიდენტო არჩევნებს ბოიკოტს უცხადებს

დემოკრატიული მოძრაობის ლიდერი, ნინო ბურჯანაძე 2018 წლის საპრეზიდენტო არჩევნებში მონაწილეობას არ მიიღებს. განცხადება ნინო ბურჯანაძემ დღეს გამართულ ბრიფინგზე გააკეთა.

„ვაცხადებ, რომ არ ვაპირებ ივანიშვილის მიერ დადგმულ ფარსში მონაწილეობის მიღებას და ჩემი თანამოაზრეების ამ ფარსში ჩართვას. დღეიდან ვიწყებთ ბრძოლას საპარლამენტო არჩევნებისათვის და ხელისუფლებაში მოსვლისთვის. ხელისუფლებაში მოსვლისთვის არა იმ მიზნით, რომ საკუთარი სურვილები და ინტერესები განვახორციელოთ, როგორც ამას დღევანდელი ხელისუფლება და ივანიშვილი აკეთებს, არამედ ხელისუფლებაში მოსვლისთვის ვიბრძოლებთ იმ მიზნით, რომ შევცვალოთ ის დამამცირებელი ოლიგარქიული მმართველობა, რომელიც დღეს ქვეყანაში ჩამოყალიბდა. უნდა დავუბრუნო ჩემს ქვეყანას ღირსება და ნორმალური განვითარების პერსპექტივა. ამისთვის აუცილებელია ეს ფარსი გავატაროთ ჩვენი მონაწილეობის გარეშე, რომ არ ფარსში მონაწილეობა არ მივიღოთ და ვიბრძოლოთ იმისთვის, რომ დღეიდან შეიქმნას ისეთი ძალა, რომელიც ქართველი ერის ამ დამცირებას ბოლოს მოუღებს", - განაცხადა ბურჯანაძემ.

ბურჯანაძემ ბრიფინგზე პრეზიდენტის ინსტიტუტის შესახებაც ისაუბრა.

„სამწუხაროდ, ამ ინსტიტუტის მიზანმიმართულ ნგრევაზე საზოგადოებას პროტესტი არ გამოუხატავს. საზოგადოებამ ვერ გააცნობიერა, რომ აღნიშნული ქვეყანას ასუსტებდა და მხოლოდ ოლიგარქის ძალაუფლებას აძლიერებდა. პრეზიდენტის ინსტიტუტი დღეს არის არა ქვეყნის, არამედ ივანიშვილის სურვილების განხორციელების სიმბოლო. ემსახურება ერთი ადამიანის და მისი ახლობლების კომფორტულ გარემოში ცხოვრებას", - თქვა ნინო ბურჯანაძემ.

ნინო ბურჯანაძე 2013 წლის საპრეზიდენტო არჩევნებში მესამე ადგილზე გავიდა, მან მაშინ ხმების 10,18 პროცენტი მიიღო. 

პარტია ბოიკოტი გამოუცხადა 2010 წლის თვითმართველობის არჩევნებს და მასში მონაწილეობა არ მიუღია. 2014 წლის ადგილობრივ არჩევნებში პარტიამ ხმების 10,22 % მოიპოვა, 2016 წლის საპარლამენტო არჩევნებზე ხმების 3,54 %, ხოლო 2017 წლის ადგილობრივ არჩევნებზე ხმების 2,59%.

2018 წლის თებერვალში ნინო ბურჯანაძე აცხადებდა, რომ საპრეზიდენტო არჩევნებში მასზე კარგი კანდიდატი არავინ არ იქნებოდა. ბურჯანაძის თქმით, ის თავის თავზე უკეთესად მიიჩნევს  ისეთ კანდიდატს, რომელიც უფრო გამოცდილი, უფრო კომპეტენტური იქნება და მასზე გაცილებით უკეთესი კონტაქტები ექნება.

საქართველოში საპრეზიდენტო არჩევნები 2018 წლის ოქტომბერში გაიმართება.