სალომე ზურაბიშვილის ახალი განცხადება აგვისტოს ომის თაობაზე მმართველ გუნდში შეაფასეს

პირველი რესპუბლიკის მოედანი ნომერი 6 - ამ მისამართზე დღეიდან სალომე ზურაბიშვილის საარჩევნო შტაბი იწყებს მუშაობას. დამოუკიდებელმა კანდიდატმა დღევანდელი გამოსვლის დიდი ნაწილი საკუთარი განცხადებების განმარტებას დაუთმო. პრესკონფერენციის დროს, ზურაბიშვილმა განაცხადა, რომ რუსეთი ოკუპანტია და რომ 2008 წლის ომი რუსეთმა დაიწყო.

"რუსეთთან ჩემი დამოკიდებულება 60 წელზე მეტია უცვლელია. საქართველოს გათავისუფლება ჩემი ცხოვრების მრწამსი და ოცნებაა. მისი დამოუკიდებლობის დაცვა რუსეთისგან. რუსეთი აგრესორი და ოკუპანტია - ეს შემიძლია უსასრულოდ გავიმეორო.

2008 წელს რუსეთმა დაარღვია ყველა შეთანხმება, რომელშიც აღიარებდა საქართველოს სუვერენიტეტს. რუსეთი შემოიჭრა მის მიერ აღიარებულ საქართველოს ტერიტორიაზე ტანკებით და სამხედრო თვითმფრინავებით და საქართველო რუსეთის ტერიტორიაზე არასდროს შეჭრილა", - განაცხადა ზურაბიშვილმა.

შეხვედრას მმართველი პოლიტიკური ძალა სრული შემადგენლობით ესწრებოდა. 

სალომე ზურაბიშვილი ყოველთვის ამბობდა, რომ რუსეთი საქართველოს ტერიტორიაზე ტანკებითა და ქვემეხებით შემოიჭრა – ამის შესახებ ჟურნალისტებს პარლამენტის ვიცესპიკერმა ზვიად ძიძიგურმა განუცხადა, რომელიც რუსეთთან დაკავშირებით საპრეზიდენტო კანდიდატის სალომე ზურაბიშვილის დღეს გაკეთებულ განცხადებებს გამოეხმაურა.

„თუ კონტექსტიდან ამოგლეჯილ ფრაზებს განიხილავ, შეიძლება, რაღაც სახის სიუჟეტი გააკეთო, არიქა, საპრეზიდენტო კანდიდატი რას ამბობს. საქართველოს ტერიტორიაზე რუსეთი რომ შემოიჭრა, ამას სალომე ზურაბიშვილი ყოველთვის ამბობდა და დღესაც ეს გაიმეორა. სალომეს დიდი ხანია ვიცნობ, ის ყოველთვის საქართველოს ინტერესების დამცველი იყო. რუსის ჯარის გაყვანას წინ რა პერიპეტიები უსწრებდა და რამდენად რთული მოლაპარაკებების ჩამტარებელი იყო სალომე, ეს ყველას კარგად ახსოვს.

რაც შეეხება წინა ხელისუფლებას, ის დამნაშავეა იმაში, რომ სამხრეთ ოსეთი და ცხინვალი რუსეთისა და სხვა ქვეყნებმა აღიარეს. როცა ქვეყნის ხელისუფალი ხარ, ვალდებული ხარ, ტერიტორიული მთლიანობა შეინარჩუნო და ამის გაკეთების შესაძლებლობა იყო, არსებობდა და მიმაჩნია, რომ წინა ხელისუფლება ამ საკითხში პასუხისმგებლობას ვერ გაექცევა. სალომე ყოველთვის ამბობდა, რომ რუსეთი საქარველოს ტერიტორიაზე ტანკებით, ქვემეხებით შემოიჭრა”, – განაცხადა ძიძიგურმა.

„დარწმუნებული ვარ, მომავალში ერთად შევძლებთ, რომ რუსული ბაზები საქართველოდან ხელმეორედაც გავიყვანოთ, ქვეყნის დეოკუპაცია მოვახდინოთ და ჩვენი ქვეყნის ტერიტორიული მთლიანობა აღვადგინოთ. ამისთვის მნიშვნელოვანია, რომ არჩეული პრეზიდენტი ისეთი ადამიანი გახდეს, რომელიც ამ შემთხვევაში, იქნება არა რომელიმე კონკრეტული პარტიის დღის წესრიგის გამტარებელი პრეზიდენტი, არამედ იქნება ზეპარტიული ფიგურა, საზოგადოებისა და პოლიტიკური ძალების აზრის შემკრები. დარწმუნებული ვარ, სალომე ზურაბიშვილი შეძლებს, ეს მისია შეასრულოს“, – განაცხადა არჩილ თალაკვაძემ.

თბილისის მერი დღეს,  „ქართული ოცნების“ სხვა წარმომადგენლებთან ერთად, სალომე ზურაბიშვილის საარჩევნო შტაბის გახსნას დაესწრო.

„რუსეთმა დაიწყო ომი და მაგას ამბობდა სალომე ზურაბიშვილი. ორი აზრი არ არსებობს, რომ რუსეთი არის აგრესორი, ჩვენი ტერიტორიები ოკუპირებულია, უბრალოდ სიმართლეს უნდა გავუსწოროთ თვალი და უნდა ვთქვათ, რომ „ნაციონალურ მოძრაობას“ არანაირი უფლება არ გააჩნია ისაუბროს ომსა და 2008 წელზე. მათ ჰქონდათ შესაძლებლობა, რომ ეს ყველაფერი თავიდან აეცილებინათ. არანაირი შესაძლებლობა და შანსი არ უნდა დავუტოვოთ ადამიანებს, რომლებმაც ძალიან დიდი წვლილი შეიტანა იმაში, რომ დღეს ჩვენი ქვეყანის ტერიტორიების დაახლოებით 20 პროცენტი ოკუპირებულია. ამ ადამიანებმა ძალიან დიდი როლი ითამაშეს, რომ ჩვენ ასეულობით სოფელი და მებრძოლო გმირები დავკარგეთ. მშვიდობიანი მოსახლეობა დაიღუპა. ეს ყველაფერი არ უნდა დავუშვათ.“, – განაცხადა კახა კალაძემ.

საქართველოს საგარეო საქმეთა ყოფილი მინისტრის (2004-2005 წლები) სალომე ზურაბიშვილის მთავარ დამსახურებად ბევრი საქართველოს ტერიტორიიდან რუსული სამხედრო ბაზების გაყვანაში მის წვლილს ასახელებს. ამ მოლაპარაკებებს რუსეთთან სწორედ ზურაბიშვილი აწარმოებდა. ამის მიუხედავად, საპრეზიდენტო კამპანიის დაწყებისთანავე, 2008 წლის აგვისტოს ომზე განცხადების გამო, ზურაბიშვილი პრორუსულ შეხედულებებში დაადანაშაულეს.

ჟურნალისტის შეკითხვაზე პასუხოდ მან თქვა, რომ რუსეთმა საქართველოს წინააღმდეგ ომი ჯერ კიდევ 100 წლის წინ დაიწყო. თუმცა, საქართველო წამოეგო რუსულ პროვოკაციას, რამაც კონფლიქტის ახალი ტალღის პროვოცირება გამოიწვია.

სალომე ზურაბიშვილის ეს განცხადება ოპოზიციისა და მმართველი პარტიის ბევრ წარმომადგენელს არ მოეწონა. მაგრამ მოგვიანებით მან განმარტა, რომ 2008 წელს რუსეთი მოქმედებდა როგორც აგრესორი, თუმცა მისი თქმით, სააკაშვილმა და მისმა გარემოცვამ მოსკოვს მიზნების განხორციელებაში შეუწყვეს ხელი, რადგან რუსულ პროვოკაციაზე სამხედრო რეაგირება მოახდინეს. ეს კი რუსეთმა გამოიყენა როგორც საბაბი, საქართველოს წინააღმდეგ ახალი ომის დასაწყებად.

„ეს იყო სააკაშვილის და ნაციონალური მოძრაობის უდიდესი დანაშაული ქართველი ხალხისა და ქვეყნის წინაშე. ჩვენი სამოქალაქო ვალია ეს გვახსოვდეს“, - დაწერა ზურაბიშვილმა.

ეს განმარტება შეესაბამება "ქართული ოცნების" პოზიციას, რომელიც გულისხმობს, რომ რუსეთი 2008 წლის ომში აგრესორი და ომის ინიციატორი იყო, მაგრამ რომ არა სააკაშვილის მთავრობის ავანტიურისტული მიდგომა, მოსკოვს არაფერი გამოუვიდოდა.

საქართველოში საპრეზიდენტო არჩევნები 2018 წლის 28 ოქტომბერს ჩატარდება.

სალომე ზურაბიშვილს საპრეზიდენტო გეგმების შესახებ ინფორმაციას ვრცლად შეგიძლიათ გაეცნოთ ამ სტატიაში.