ეკა გიგაური თეა წულუკიანს: მუდმივად არავინაა მთავრობაში და მაინც მოგიწევთ ჩემთან მოსვლა

იუსტიციის მინისტრს, თეა წულუკიანსა და მესამე სექტორის წარმომადგენლებს შორის ისევ დაპირისპირებაა. მინისტრმა დანიაში გამართულ ანტიკორუფციულ კონფერენციაზე სამოქალაქო საზოგადოების წარმომადგენლებზე დაყრდნობით განაცხადა, რომ „საერთაშორისო გამჭვირვალობა – საქართველოს“ ხელმძღვანელი, რომელსაც ნაციონალური მოძრაობის მმართველობის დროს შსს-ში მაღალი თანამდებობა ეკავა, სავარაუდოდ, 2007 წლის ნოემბრის საპროტესტო აქციის დარბევის ხელშეწყობაში მონაწილეობდა. წულუკიანმა დასძინა, რომ ეს საქმე სასამართლოში ისევ განიხილება. 

დანიაში იუსტიციის მინისტრმა კონფერენციაზე განაცხადა, რომ საქართველოში არასამთავრობო ორგანიზაციებისთვის ნაყოფიერი ნიადაგი არსებობს, "რათა დაფუძნდნენ და დაიწყონ მუშაობა და აქტიურები იყვნენ სოფლებში, პატარა თუ დიდ ქალაქებში. სამწუხაროდ, ჩვენ ახლა ვხდებით მოწმეები, როდესაც ერთი კონკრეტული არასამთავრობო ორგანიზაცია მთელი სამოქალაქო საზოგადოების სახელით საუბრობს", - განაცხადა წულუკიანმა.

მინისტრის თქმთ, "OGP"-ის თანათავმჯდომარეობის დროს, ცხარე დებატების გამართვის შესაძლებლობა იყო როგორც საქართველოში, ასევე მის ფარგლებს გარეთ.

"ცოტა ხნის წინ, საქართველოში ადგილი ჰქონდა ძალიან დიდ საზოგადოებრივ სკანდალს „საერთაშორისო გამჭვირვალობა – საქართველოს“ ხელმძღვანელის გარშემო, რომელსაც ადრე, ყოფილი მმართველი პარტიის დროს, მაღალი თანამდებობა ეკავა შინაგან საქმეთა სამინისტროში. სამოქალაქო საზოგადოების წარმომადგენლები დოკუმენტებით ხელში აცხადებდნენ, რომ, ის, სავარაუდოდ, მონაწილეობას იღებდა მშვიდობიანი მანიფესტების დარბევის ხელშეწყობაში 2007 წლის ნოემბერში. ეს საქმე ამჟამად საქართველოს სასამართლოში განიხილება, სადაც აღნიშნული პიროვნება დღემდე არ გამოცხადებულა პასუხების გასაცემად.

ამიტომაც ჯერ არ შემოვალ ამ დისკუსიაში, რადგან საზოგადოებამ ზუსტად უნდა გაიგოს, იღებდა თუ არა „საერთაშორისო გამჭვირვალობა – საქართველოს“ თავმჯდომარე, რომელსაც იმ დროს პოლიციის მაღალი თანამდებობა ეკავა, მონაწილეობას მშვიდობიანი მანიფესტაციის დარბევის ხელშეწყობაში, რასაც ერთი პირის გარდაცვალება და ბევრი მოქალაქის დაშავება მოჰყვა. ეს საქართველოს სასამართლომ უნდა გადაწყვიტოს“, - განაცხადა თეა წულუკიანმა.

სწორედ მინისტრის ამ განცხადებებს გამოეხმაურა საერთაშორისო გამჭვირვალობა - საქართველოს ხელმძღვანელი ეკა გიგაური Facebook-ზე. 

"არ გცხვენია თეა აქ ამას რომ ლაპარაკობ? ზუსტად იცი, რომ პატივის, ღირსებისა და საქმიანი რეპუტაციის შელახვისთვის მე ვუჩივლე თქვენ სატელიტებს. ვიცოდი, რომ თქვენგან იმართებოდნენ, მაგრამ ახლა ნამდვილად დავრწმუნდი ამაში. მუდმივად არავინაა მთავრობაში და მაინც მოგიწევთ ჩემთან მოსვლა როდესაც თქვენი უფლებები დაირღვევა როგორც ამას 2012 წელს აკეთებდით.
პ.ს. ბოტებს თუ არ მომიგზავნი დიდად დამავალებ", – წერს ეკა გიგაური Facebook-ზე.

მესამე სექტორი ხელისუფლების მხრიდან კრიტიკის ობიექტი არაერთხელ გამხდარა. ბოლოს არასამთავრობო ორგანიზაციები პარლამენტის თავმჯდომარემ ირაკლი კობახიძემ გააკრიტიკა. ივნისში კი არასამთავრობო სექტორი მინისტრის თეა წულუკიანის გადადგომას მოითხოვდა. 

რაც შეეხება სასამართლო პროცესს, რომელიც დანიაში თავის განცხადებაში თეა წულუკიანმა ახსენა. საქმე ეხება 2014-2015 წლებში გოგა ხაინდრავასა და გურამ ადამაშვილის მიერ სატელევიზიო ეთერით გაკეთებულ განცხადებებს. მოპასუხეებმა გიგაურს ბრალად დასდეს 2007 წლის ნოემბრის აქციების ძალისმიერი მეთოდით დაშლა და წახალისება. ეკა გიგაურის უფლებადამცველი, სიმბოლურად, მორალური ზარალის ასანაზღაურებლად 30 თეთრს ითხოვს.

რეჟისორი გოგა ხაინდრავა აცხადებს, რომ აქვს ბრძანება, რომელიც ეკა გიგაურისთვის კაპიტნის წოდების ვადაზე ადრე მინიჭებას ადასტურებს.

ხაინდრავას განცხადებით, კაპიტნის წოდება გიგაურმა 7 ნოემბრის აქციაში დარბევის გამო მიიღო. მისივე ხელმოწერით 7 ნოემბრის დარბევაში მონაწილე ბარისახოს მესაზღვრეები კი პრემიით დაჯილდოვდნენ.

გიგაურის უფლებადამცველების თქმით, სასაზღვრო პოლიციასა და ეკა გიგაურს 7 ნოემბრის დარბევაში მონაწილეობა არ მიუღიათ.