არასამთავრობოები ირაკლი კობახიძის კრიტიკას მესამე სექტორის დისკრედიტაციის მცდელობად აფასებენ

პარლამენტის თავმჯდომარის ირაკლი კობახიძის მიერ არასამთავრობო სექტორის კრიტიკასთან დაკავშირებით გამოთქმულ განცხადებს, მესამე სექტორის წარმომადგენლები არასამთავრობო ორგანიზაციების დისკრედიტაციის მცდელობით ხსნიან.

"მე მგონია რომ ეს ემსახურება არჩევნების წინ იმ არასამთავრობოების დისკრედიტაციას, რომლებიც წლებია აკვირდებიან არჩევნებს, ვისი ანგარიშებიც არჩევნებთან დაკავშირებით არის უაღრესად მნიშვნელოვანი. თუ არჩევნებზე იქნება დარღვევები ჩვენ გვექნება მწვავე შეფასებები, უბრალოდ შემდეგ ისინი ისაუბრებენ, რომ ეს პოლიტიკურად მოტივირებულია", - განაცხადა საიას ხელმძღვანელმა სულხან სალაძემ.

"საერთაშორისო გამჭვირვალობა-საქართველოს" აღმასრულებელ დირექტორს ეკა გუგარუს კი მიაჩნია, რომ ქვეყანაში სხვა მიმართულებით არაერთი პრობლემაა და პოლიტიკოსებს ამაზე უნდა ჰქონდეთ რეაქცია.

"ჩვენს ქვეყანაში არის ძალიან ბევრი პრობლემა, დაწყებული მოქალაქეების სოციალური მდგომარეობით და დამთავრებული წინასაარჩევნო პერიოდის სხვადასხვა მოვლენით. ვფიქრობ, რომ პოლიტიკოსებს ზუსტად ამაზე უნდა ჰქონდეთ რეაგირება. ჩვენი ასეთი დაუსაბუთებელი კრიტიკის მიზანი, ალბათ, არის ის, რომ ჩვენი რეპუტაცია შეილახოს წინასაარჩევნოდ", - განაცხადა ეკა გიგაურმა.

„სამართლიანი არჩევნების” აღმასრულებელმა დირექტორმა მიხეილ ბენიძემ კი თქვა, რომ ასეთი შეფასებები მიზნად ისახავს იმის წარმოჩენას, რომ ყველაზე დიდი პრობლემა დღეს არასამთავრობო ორგანიზაციებია.

"ეს პიროვნული შეტევები ახლა არის სრულიად მიუღებელი, ჩვენ არ ვაპირებთ, რომ ამაში ავყვეთ ბატონ კობახიძეს. მე მგონია, რომ საქართველოს პარლამენტის თავმჯდომარეს უნდა ჰქონდეს უფრო მეტი საქმე და საზრუნავი იმ პერიოდში, როდესაც ამ ქვეყნის მოქალაქეებს ოკუპირებული ტერიტორიებიდან ყოველდღიურად იტაცებენ და ასეთი ფაქტი გუშინაც ვნახეთ. მათი ტაქტიკა დღეს არის ის, რომ პრობლემებზე საუბრის ნაცვლად, მათ ბურთი თუ ლოდი გადმოაგდონ სხვის ბოსტანში და ისეთი შთაბეჭდილება შექმნან, თითქოს არასამთავრობო ორგანიზაციებია ქვეყანაში ყველაზე დიდი პრობლემა. თამამად შემიძლია გითხრათ, რომ გასული ორი არჩევნების პერიოდში ასეთი ორგანიზებული შეტევა ნამდვილად არ იგრძნობოდა", - განაცხადა მიხეილ ბენიძემ.

პარლამენტის თავმჯდომარემ ირაკლი კობახიძემ "რუსთავი 2"-ის გენერალურ დირექტორის ნიკა გვარამიას Facebook-პოსტი გააკრიტიკა და თქვა, რომ ნიკა გვარამიას განცხადება ხელმოცარული ფაშისტის განცხადებაა. კობახიძემ არასამთავრობო სექტორიც გააკრიტიკა და თქვა, რომ ზოგიერთი პოლიტიზირებული პერსონის გამო არასამთავრობო სექტორის იდეა ზიანდება.

პოსტში ნიკა გვარამია წერს, რომ ყველა ვინც ზურაბიშვილს უჭერს მხარს და მის საარჩევნო კამპანიას აფინანსებს, საზოგადოებამ უნდა დაიმახსოვროს, რომ ისინი "მოღალატის გვერდში მდგომი ხალხია".

გვარამიას პოსტის შესახებ 5 ოქტომბერს ინფორმაცია სალომე ზურაბიშვილმა ევროკავშირის ელჩებს მიაწოდა. მან ასევე განაცხადა რომ მსოფლიოში არასამთავრობოები ქალებს იცავენ, "ჩვენთან მის წინააღმდეგ ილაშქრებენ".

საქართველოში საპრეზიდენტო არჩევნები 2018 წლის 28 ოქტომბერს გაიმართება.