გრიგოლ ვაშაძეს სალომე ზურაბიშვილთან ოთხი შეკითხვა აქვს

„ნაციონალური მოძრაობის“ ოპოზიციური ჯგუფის პრეზიდენტობის კანდიდატმა გრიგოლ ვაშაძელ დამოუკიდებელ საპრეზიდენტო კანდიდატს, სალომე ზურაბიშვილს ოთხი შეკითხვით მიმართა. ვაშაძის თქმით, ეს ის შეკითხვებია, რომლებიც საზოგადოებაში არსებობს.

"რამდენიმე კვირაა, რაც ქვეყანა შეძრა უსამართლობისა და უკანონობის კასკადმა, რისი მტკიცებულებებიც ვიხილეთ და მოვისმინთ. ამაზე მუდმივად საუბრობს საზოგადოება და ჩვენი შტაბი, მაგრამ არცერთი სიტყვა არ გაგვიგია პრეზიდეტობის სამთავრობო კანდიდატისგან.

მხოლოდ ის ვიცით, რომ ის მხარს უჭერს საქართველოს მარიხუანის პლანტაციად გადაქცევას და ასევე ეთანხმება პუტინ-მედვედევს, რომ 2008 წელს რუსეთ-საქართველოს ომი საქართველომ დაიწყო. საზოგადებას აქვს უფლება პრეზიდენტობის სამთავრობო კანდიდატისგან მიიღოს პასუხები შემდეგ კითხვეზე: პარლამენტის საგამოძიებო წევრობისას რატომ არ დაუჭირა მხარი დათუნა სარალიძის მკვლელების დასჯას; რატომ არ გამოეხმაურა და რა პოზიცია აქვს ციხეში გაკეთებულ მირზა სუბელიანის ფარულ ჩანაწერებზე; რატომ არ გამოეხმაურა კომპანია "ომეგას" დარეკეტებას და "იბერიის" დახურვას; რატომ არ გამოეხმაურა და რა პოზიცია აქვს ივანიშვილის კანდიდატს მედიაში ნაჩვენებ ე.წ. ქართული ოცნების მაღალჩინოსნების სასახლეებზე,“- განაცხადა გრიგოლ ვაშაძემ.

კანაფის კულტივაციასთან დაკავშირებით, ამომრჩევლებთან ერთ-ერთ შეხვედრაზე სალომე ზურაბიშვილმა განაცხადა, რომ ის ლეგალიზაციის მომხრე არ არის და არასდროს იქნება. 

რაც შეეხება საქართველო-რუსეთის ომთან დაკავშირებულ საკითხს, სალომე ზურაბიშვილმა საარჩევნო კამპანიის დასაწყისში თქვა, რომ რუსეთმა საქართველოს წინააღმდეგ ომი ჯერ კიდევ 100 წლის წინ დაიწყო. თუმცა, საქართველო წამოეგო რუსულ პროვოკაციას, რამაც კონფლიქტის ახალი ტალღის პროვოცირება გამოიწვია.

სალომე ზურაბიშვილის ეს განცხადება ოპოზიციისა და მმართველი პარტიის ბევრ წარმომადგენელს არ მოეწონა. მაგრამ მოგვიანებით მან განმარტა, რომ 2008 წელს რუსეთი მოქმედებდა როგორც აგრესორი, თუმცა მისი თქმით, სააკაშვილმა და მისმა გარემოცვამ მოსკოვს მიზნების განხორციელებაში შეუწყვეს ხელი, რადგან რუსულ პროვოკაციაზე სამხედრო რეაგირება მოახდინეს. ეს კი რუსეთმა გამოიყენა როგორც საბაბი, საქართველოს წინააღმდეგ ახალი ომის დასაწყებად.

„ეს იყო სააკაშვილის და ნაციონალური მოძრაობის უდიდესი დანაშაული ქართველი ხალხისა და ქვეყნის წინაშე. ჩვენი სამოქალაქო ვალია ეს გვახსოვდეს“, - დაწერა ზურაბიშვილმა.