შშმ პირები მამუკა ბახტაძეს მიმართავენ

მენტალური და ფსიქიკური პრობლემების მქონე პირების ოჯახის წევრები და უფლებდამცველები პრემიერმინისტრ მამუკა ბახტაძეს ღია წერილით მიმართავენ. წერილში საუბარია ადამიანებზე, რომლებიც დღემდე სახელმწიფო მიერ დაფინანსებულ დიდი ზომის ინსტიტუციებში ცხოვრობენ. ასეთი სულ 730 ადამიანია. ინფორმაციას „ლიბერალი“ ავრცელებს.

წერილში ნათქვამია, რომ დღეს საქართველოში მხოლოდ 25 ადამიანი იმყოფება საოჯახო ტიპის, ღირსეულ საცხოვრებელ გარემოში.

განცხადების მიხედვით, 2019 წელს ადამიანის უფლებების სამთავრობო გეგმის მიხედვით, იგეგმება შშმ პირების დიდი ინსტიტუციებიდან გაყვანა.

შშმ ბავშვების მშობლები წერენ, რომ მათი ცნობით, „სახელმწიფო „ამ ადამიანებისთვის გეგმავს სხვადასხვა ტიპის ახალი ინსტიტუციების აშენებას და ამით გვიჩვენებს, სინამდვილეში რამდენად არასწორად იაზრებს არსებულ პრობლემებს და ცვლილებების საჭიროებას ისევ და მხოლოდ ინფრასტრუქტურის შელამაზებაში ხედავს. მეტიც,  თავისი პოლიტიკით ხელს უწყობს შშმ პირთა ინსტიტუციონალიზებას“.

მშობლები პრემიერს კონკრეტული მოთხოვნებით მიმართავენ. „მოხდეს 2019 წლის ბიუჯეტის სოციალური რეაბილიტაციისა და ბავშვზე ზრუნვის პროგრამის ,,შშმ პირთა დამოუკიდებელი, ოჯახური ტიპის საცხოვრებლის“ კომპონენტის დაფინანსების გაზრდა 16 ლარიდან 32 ლარამდე. შეიქმნას მულტისექტორული და მულტიდისციპლინური სამუშაო ჯგუფი, რომელიც ადამიანის უფლებების გეგმის ზემოაღნიშნული პუნქტების შესაბამისად, იმუშავებს დეინსტიტუციონალიზაციის (როგორც ფსიქიკური ჯანდაცვის, ასევე სოციალური პროგრამებით დაფინანსებული ინსტიტუციების)  სამოქმედო გეგმაზე. ჯგუფში სათანადო წარმომადგენლობა უნდა ჰქონდეთ შშმ პირებს და მათი ოჯახის წევრებს,  სოციალური მომსახურების სპეციალისტებს, უფლებადამცველებს. შშმ პირთა უფლებების ბაზისური პრინციპია, რომ არცერთი გადაწყვეტილება შშმ პირთა შესახებ არ უნდა მიიღებოდეს მათი მონაწილეობის გარეშე“, - ნათქვამია პრემიერისთვის გაგზავნილ წერილში.