კალაძე: ამაზრზენი ინტერპრეტაციაა, თითქოს მერია სარალიძეს ნაძვის ხით ანაცვლებს

დედაქალაქის მერმა, კახა კალაძემ არასწორ ინტერპრეტაციად და მიზანმიმართულ დეზინფორმაციად შეაფასა კონკრეტული მედისაშუალებების მიერ გავრცელებული ინფორმაცია, რომ თითქოს „კახა კალაძემ ზაზა სარალიძე ნაძვის ხით ჩაანაცვლა“.

როგორც კახა კალაძემ აღნიშნა, რუსთაველის გამზირზე, ზაზა სარალიძისთვის კარვის დადგმა მერიას არ აუკრძალავს, რადგან კარვის განთავსებაზე ნებართვის გაცემა მუნიციპალიტეტის უფლებამოსილებას სცილდება.

მისი თქმით, ზაზა სარალიძის მიერ მერიაში შეტანილ განცხადებაზე წერილობითი პასუხი კანონის ფარგლებში გაიცა. „კარვის დადგმა მერიას არ აუკრძალავს. ეს ჩვენს კომპეტენციაში არ შედის. ჩვენ ამის არანაირი უფლებამოსილება არ გვაქვს. უბრალოდ, სამწუხაროა და ამაზრზენი ის უტიფარი ინტერპრეტაცია, რომელიც კონკრეტულმა სააგენტოებმა და ჟურნალისტებმა ჩემს მიერ გუშინ გაკეთებულ განცხადებასთან დაკავშირებით გაავრცელეს. მათ დაწერეს, რომ დედაქალაქის მერია სარალიძეს ნაძვის ხით ანაცვლებს. ასე როგორ შეიძლება? სად იზრდებიან ეს ადამიანები? ან ოჯახში არ გაზრდილან, ან დედა არ ჰყავთ, ან მამა? შვილმოკლული მამის ასეთი ფორმით გამოყენება და ასეთი შეურაცხყოფის მიყენება დაუშვებელია. ჟურნალისტიკა ეს არის თავისუფლების რუპორი და არა რაღაც პარტაგიტატორების. ეს დამოკიდებულება კატეგორიულად მიუღებელია ჩემთვის. მერიას არანაირი უფლებამოსილება არ აქვს, კარვის დადგმაზე ან ნებართვა მისცეს ან უარი უთხრას. მე კიდევ ერთხელ ვიმეორებ, ზაზა სარალიძის მიერ შემოტანილი განცხადებას დედაქალაქის მერიამ კანონის შესაბამისად უპასუხა.

კერძოდ, მან შემოიტანა წერილი რუსთაველის გამზირზე აქციის დეკემბრის ბოლომდე გაგრძელებასთან დაკავშირებით. დედაქალაქის მერიის მხრიდან იყო საპასუხო განცხადება, რომ პარლამენტის შენობის წინ დაგეგმილი ნაძვის ხის ანთების ცერემონიისა და საახალწლო ღონისძიებების მოსამზადებელ პერიოდთან დაკავშირებით, მიმდინარე წლის 7 დეკემბრიდან დაგეგმილი აქციის ჩატარების დრო და ადგილი შეეცვალა, რაც კონკრეტული მედიასაშუალებების მეშვეობით საზოგადოებაში ასეთი უტიფარი ინტერპრეტაციებით გავრცელდა. ჩვენ ყველაფერი უნდა გავაკეთოთ იმისთვის, რომ დაპირისპირება და რაიმე სახის პროვოკაცია თავიდან ავიცილოთ. ჩვენ გვჭირდება სიმშვიდე და სტაბილურობა“, - განაცხადა კახა კალაძემ.

ზაზა სარალიძის ინფორმაციით, მერიისთვის 1 ნოემბერს გაგზავნილ წერილზე, რომელშიც მოითხოვდა აქციების 31 დეკემბრამდე გაგრძელებას და კარვების განთავსებას, მერიაში უპასუხეს, რომ 7 დეკემბრიდან აქციის ადგილი უნდა შეიცვალონ, რადგან პარლამენტის წინ საახალწლო ნაძვის ხე უნდა დაიდგას. 

პარლამენტთან აქციებს ზაზა სარალიძე და მალხაზ მაჩალიკაშვილი 10 სექტემბრიდან მართავენ. 

სარალიძის შვილი, დავით სარალიძე ერთ-ერთი იყო 2017 წლის პირველ დეკემბერს ხორავას ქუჩაზე მოკლული ორი არასრულწლოვნიდან. ამ საქმეზე პარლამენტში დროებითი საგამოძიებო კომისია შეიქმნა. საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. მკვლელობის საქმეზე ახალი გარემოებების დადგენის მიზნით, გამოძიებას უშუალოდ გიორგი გახარია ხელმძღვანელობს.

მალხაზ მაჩალიკაშვილის 19 წლის ვაჟი, მაჩალიკაშვილი კი სახელმწიფო უსაფრთხოების სამსახურის მიერ პანკისის ხეობაში ჩაატარებული სპეცოპერაციის დროს დაჭრეს, რის შედეგადაც ის 10 იანვარს გარდაიცვალა. გამოძიების ვერსიით, თემირლან მაჩალკაშვილსა და ამ ტერორისტულ დაჯგუფებას შორის კავშირი დადგინდა.