ეკა ბესელია ანრი ოხანაშვილის კანდიდატურას მხარს არ უჭერს

იურიდიული კომიტეტის ყოფილი თავმჯდომარე ეკა ბესელია განმარტავს, რომ საპარლამენტო უმრავლესობის მიერ დღეს მიღებულ გადაწყვეტილებას არ ეთანხმება და იურიდიული კომიტეტის ახალ თავმჯდომარედ ანრი ოხანაშვილის კანდიდატურას მხარს არ უჭერს. ბესელია აცხადებს, რომ მას ამ თანამდებობაზე ლევან გოგიჩაიშვილის დანიშვნა სურდა.

„არ ვეთანხმები პოზიციას, რაც უმრავლესობის შიგნით შეჯერდა, თუმცა საბოლოო გადაწყვეტილება სესიაზე უნდა მიიღონ. ლევან გოგიჩაიშვილის კანდიდატურა ჩემთვის არის იმ ღირებულებების და ფასეულობების დაცვა, რომელსაც ჩვენ ვიცავთ ამ პროცესში. ამიტომ ჩემთვის არამხოლოდ სახელს და გვარს, არამედ სტანდარტების დაცვას აქვს ძალიან დიდი მნიშვნელობა. ანრი ოხანაშვილის კანდიდატურას მე სწორედ ამიტომ არ ვუჭერ მხარს და პირდაპირ ვამბობ - არ დავუჭერ მხარს. ეს არ არის პერსონალური ამბავი, ეს არის საკითხი, რომელიც ეხება განსაკუთრებით სასამართლოსთან დაკავშირებულ ხედვას და აქ იმ პრინციპების დაცვას, რასაც ჩვენ ვიცავთ“, - განაცხადა ეკა ბესელიამ.

ფრაქცია „ქართული ოცნების“ თავმჯდომარემ მამუკა მდინარაძემ განაცხადა, რომ უმრავლესობამ ანრი ოხანაშვილთან დაკავშირებით გადაწყვეტილება ერთხმად მიიღო. მისი ინფორმაციით, მხოლოდ 3 დეპუტატი იყო წინააღმდეგი იურიდიული კომიტეტის თავმჯდომარის პოზიციაზე ანრი ოხანაშვილი დაესახელებინათ.

მანამდე უმრავლესობამ პარლამენტის იურიდიული კომიტეტის თავმჯდომარედ ანრი ოხანაშვილი დაასახელა. მედიასთან განცხადება უმრავლესობის ლიდერმა არჩილ თალაკვაძემ გააკეთა.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა. ამ კანდიდატების დასახელებამ საზოგადოების ვნებათაღელვა გამოიწვია.