როს უილსონი: ანგარიში კრიტიკულია და ასეც უნდა იყოს მეგობრის პოზიციიდან

აშშ-ს სახელმწიფო დეპარტამენტმა ადამიანის უფლებების 2018 წლის ანგარიში გამოაქვეყნა, რომელიც სხვა ქვეყნებთან ერთად ცალკე საქართველოს ეძღვნება. მათ შორის საპრეზიდენტო არჩევნებზე, რუსეთის მიერ ოკუპირებულ ტერიტორიებზე არსებულ ვითარებაზე, თემირლან მაჩალიკაშვილის საქმეზე, ოთხოზორია-ტატუნაშვილის სიაზე. აგრეთვე აზერბაიჯანელი ჟურნალისტის აფგან მუხთარლის საქმეზე. 

ანგარიშის შესახებ შეფასებები საქართველოში უკვე გაკეთდა. საქართველოს საგარეო საქმეთა მინისტრის, დავით ზალკალიანის განცხადებით, "ჩვენთვის ამერიკელი პარტნიორების რეკომენდაციები გასათვალისწინებელია და ყოველთვის ვითვალისწინებთ".

"ეს არის ანგარიში, რომელშიც წარმოდგენილია სხვადასხვა არასამთავრობო ორგანიზაციისა და ოპოზიციური პარტიის შეფასებების კომპილაცია", – განაცხადა დავით ზალკალიანმა.

ანგარიშთან დაკავშირებით განცხადება გააკეთა საქართველოში აშშ-ის ელჩის მოვალეობის შემსრულებელმა როს უილსონმა. მისი თქმით, ანგარიში არის კრიტიკული, თუმცა ეს ბუნებრივია. ელჩის მოვალეობის შემსრულებლის განმარტებით, ანგარიშზე მომუშავე ადამიანების საერთო პრინციპია ის, რომ კრიტიკულად შეხედონ საკითხებს, რომლებიც ადამიანის უფლებებს ეხება.

"ანგარიშზე მომუშავეებს საერთო სახელმძღვანელო პრინციპები აქვთ, რომლებიც კრიტიკულად უყურებენ იმ საკითხს, თუ როგორ იცავს ქვეყანა ადამიანის უფლებების საერთაშორისოდ აღიარებულ ნორმებს. საქართველოს შესახებ ანგარიში კრიტიკულია. ასეც უნდა იყოს ამ ქვეყნის მთავრობის მტკიცე მეგობრების პოზიციიდან. საქართველო დიდი ხანია ლიდერია რეგიონში ადამიანის უფლებებისა და დემოკრატიის თვალსაზრისით და ლიდერად რჩება. ეს ის საკითხებია, რაზეც მთავრობასთან აქტიური დიალოგი გვაქვს, იმ საკითხების უმეტესობაზე მაინც, რაც ანგარიშშია მოყვანილი. ჩვენ ველით, რომ გავაგრძელებთ მტკიცე, მეგობრულ და სასარგებლო დიალოგს იმ საკითხებზე, რომელიც მნიშვნელოვანია საქართველოს მომავლისთვის. ეს ასევე მნიშვნელოვანია ამერიკელი ხალხისთვის", - განაცხადა როს უილსონმა.

ანგარიშს გამოეხმაურა საქართველოს იუსტიციის უმაღლესი საბჭოს მოსამართლე წევრი სერგო მეთოფიშვილი. მისი თქმით, ანგარიში სავარაუდოდ საბჭოს სხდომაზე გავა:

"დასკვნას გავეცანი და პირდაპირ მასშიც წერია, რომ დასკვნა ეფუძნება ისეთ არასამთავრობო ორგანიზაციებს, როგორიც არის „საერთაშორისო გამჭვირვალობა – საქართველო” და რამდენიმე სხვა, მათ შორისაა სულხან სალაძისა და ეკა გიგაურის არასამთავრობო ორგანიზაციები. გიგაურზე ბევრჯერ გამიკეთებია განცხადება, რომ ის არის ადამიანი, რომელიც აგროვებს ჭორებს და მეტს არაფერს. ეს არის უკვე დადასტურებული. მე პირადად ბევრი ჭორი ვიცი გიგაურზე, როდესაც მუშაობდა სასაზღვრო პოლიციაში და იყო ერთ-ერთი გავლენიანი მოადგილე, იმ პერიოდში, როცა ხელმძღვანელობდა სატენდერო კომისიას, საკადრო პოლიტიკას და 1 500 ადამიანი იყო გათავისუფლებული და ა.შ. მაგრამ ამ ჭორებს მე არ ვავრცელებ, თუმცა 1500 თანამშრომლის გათავისუფლება რეალობაა და არ არის ჭორი. ჭორიც ბევრი ვიცი. ამ ჭორებს არ ვაგროვებ, ის აგროვებს ზუსტად ჭორებსა და ფანტაზიებს. ეს არის დადასტურებული თუნდაც იმით, რომ „იფსოსმა“, საფრანგეთის ერთ-ერთმა უძლიერესმა და ავტორიტეტულმა ორგანიზაციამ ჩაატარა კვლევა, მათ შორის დამოუკიდებლობასთან, კორუფციასთან მიმართებაში და ა.შ. დადო დასკვნა, რომელსაც ჩვენ გავეცანით. ასეთი ავტორიტეტული კვლევითი ორგანიზაცია, ალბათ, რა თქმა უნდა, უფრო სანდოა, ვიდრე გიგაურის ჭორების შეგროვება", – განაცხადა მეთოფიშვილმა და დასძინა, რომ საბჭო ეცდება, სახელმწიფო დეპარტამენტს რეალური სურათის შესახებ მიაწოდოს ინფორმაცია.

სახელმწიფო დეპარტამენტის ანგარიშში ერთ-ერთი თავი ეძღვნება წინასწარ განზრახულ, უკანონო და პოლიტიკურად მოტივირებულ მკვლელობებს. ნახსენებია ბადრი პატარკაციშვილის საქმეც. ცალკე აბზაცში წერია, რომ 17 ოქტომბერს, საქართველოს მთავარმა პროკურატურამ ბიზნესმენ ბადრი პატარკაციშვილის მკვლელობის მომზადების საქმესთან დაკავშირებით, ფარული ჩანაწერები გაავრცელა.