ჩინეთის ელჩი: საქართველოს მთავრობამ ვირუსის გავრცელების პრევენციის კუთხით მყისიერი და ძლიერი ზომები მიიღო

საქართველოს მთავრობამ, პრემიერის ხელმძღვანელობით, მყისიერი და ძლიერი ზომები მიიღო იმისათვის, რომ მოეხდინა სრული მობილიზაცია. მთავრობის მიერ ჩამოყალიბებულმა მექანიზმმა ძალიან მნიშვნელოვანი როლი ითამაშა კორონავირუსის გავრცელების შეჩერებაში, - ამის შესახებ საქართველოს საგარეო საქმეთა მინისტრის მოადგილესთან, ალექსანდრე ხვთისიაშვილთან შეხვედრის შემდეგ საქართველოში ჩინეთის სახალხო რესპუბლიკის საგანგებო და სრულუფლებიანმა ელჩმა, ლი იენმა განაცხადა.

მინისტრის მოადგილემ ჩინეთის მხარეს მადლობა გადაუხადა კორონავირუსის გავრცელების პრევენციული ღონისძიებების ფარგლებში საქართველოს მხარდაჭერისთვის.

ჩინელ დიპლომატს ასევე მიეწოდა ინფორმაცია ვირუსის გავრცელების მხრივ საქართველოში არსებულ ვითარებაზე; იმ ქმედებებზე, რომელსაც საქართველოს მთავრობა მიმართავს კორონავირუსის წინააღმდეგ ბრძოლის თვალსაზრისით; ასევე, როგორი სახის აკრძალვებს, თუ შეზღუდვებს მიმართავს ქვეყანა დაავადების შემდგომი გავრცელების შესაჩერებლად.

ჩინეთის ელჩმა, თავის მხრივ, ქართულ მხარეს ინფორმაცია მიაწოდა ჩინეთის სახალხო რესპუბლიკაში დღეს არსებულ ვითარებასთან დაკავშირებით, კერძოდ, თუ რა ღონისძიებები გაატარა ჩინეთის მთავრობამ დაავადების გავრცელების შესაჩერებლად. მხარეები შეთანხმდნენ შემდგომშიც აქტიურად გააგრძელონ ინფორმაციის გაცვლა კოორდინირებული ურთიერთქმედების მიზნით.

„ჩინეთს და საქართველოს, როგორც მეგობარ ქვეყნებს, ერთმანეთთან კარგი თანამშრომლობა აკავშირებს. როდესაც ჩინეთში ეპიდემია გავრცელდა, ჩვენ მივიღეთ მხარდაჭერა საქართველოს მთავრობისგან და ქართველი ხალხისგან - გვინდა ამისთვის მადლიერება გამოვხატოთ. ვირუსი ახლა საქართველოშიც გავრცელდა და ეს ჩინელი ხალხისთვის ძალიან შემაშფოთებელია. გვსურს ვირუსთან ბრძოლის ჩვენი გამოცდილება და ცოდნა გაგიზიაროთ. ჩინეთის სიჩუანის პროვინცია საქართველოს უსასყიდლოდ გადასცემს სამედიცინო აღჭურვილობას და დიაგნოსტიკურ რეაგენტებს. გასულ კვირას, ჩვენ ორგანიზება გავუკეთეთ ვიდეო-შეხვედრას რამდენიმე ქვეყნის, მათ შორის, საქართველოს მონაწილეობით. ჩინელმა ექსპერტებმა და ექიმებმა საკუთარი გამოცდილება გაუზიარეს ქართველ კოლეგებს. ჩვენ ვიმედოვნებთ, რომ ქართველი ხალხი საბოლოოდ დაძლევს ამ გამოწვევას. ასევე, ჩვენ მოვუწოდებთ საქართველოში მყოფ ჩინეთის მოქალაქეებს, დაემორჩილონ ეპიდემიის პრევენციისა და კონტროლის მიზნით საქართველოს მთავრობის მიერ დაწესებულ ყველა რეგულაციას“ - განაცხადა საქართველოში ჩინეთის საგანგებო და სრულუფლებიან ელჩმა.

მსოფლიოში კორონავირუსის (COVID-19) დინამიურად გავრცელების გათვალისწინებით, საგარეო საქმეთა სამინისტროსა და საქართველოში აკრედიტებულ მისიებს შორის სისტემატურად ხორციელდება ინფორმაციის გაცვლა.

12 მარტს საქართველოში კორონავირუსით ინფიცირებულთა რიცხვი 25-მდე გაიზარდა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

რა უნდა ვიცოდეთ პანდემიის შესახებ, წაიკითხეთ აქ.