ჯანდაცვის მინისტრის მოადგილემ განმარტა ვინ უნდა ჩაიტაროს ტესტირება კორონავირუსზე

ჯანდაცვის მინისტრის მოადგილემ კორონავირუსზე ტესტირების პროცედურა განმარტა. ამის შესახებ თამარ გაბუნიამ „იმედის“ გადაცემა „დილის შოუში“ ისაუბრა. მისი თქმით, ხშირად მოქალაქეებს, რომლებსაც არც სიმპტომები და არც მაღალი რისკის ქვეყნებში მოგზაურობის ისტორია აქვთ, სხვადასხვა ჩივილების გამო ტესტირების სურვილს გამოთქვამენ, თუმცა ამას აზრი აქ აქვს.

„ასეთ შემთხვევაში ჯანმრთელობის მსოფლიო ორგანიზაციის მკაცრი რეკომენდაცია ჩვენნაირი ქვეყნებისთვის, როდესაც ჯერ ვსაუბრობთ მხოლოდ გარედან შემოტანილ შემთხვევებზე, არის ის, რომ არასიმპტომურ პირებში, ანუ თუ ადამიანს არ აქვს მაღალი ტემპერატურა, არ იმოგზაურა მაღალი რისკის ქვეყანაში, წინასწარ ტესტის ჩატარება უბრალოდ აზრს მოკლებულია, რადგან ეს ტესტი შეიძლება იყოს დღეს უარყოფითი, მაგრამ ნებისმიერ მომენტში სიტუაცია შეიცვლება. ანუ ეს არ არის გარანტია იმისთვის, რომ მომდევნო 2 კვირის განმავლობაში ან შემდეგ ეს მდგომარეობა არ დადგეს. ამდენად, ასეთ შემთხვევაში ყველას მინდა ვურჩიო, რომ არ არის საჭირო ტესტის გაკეთება“, - განაცხადა გაბუნიამ.

მინისტრის მოადგილემ ასევე ტესტირების არსებულ მეთოდებზე ისაუბრა.

„გაჩნდა ასევე სხვადასხვა ვარიანტი მოდიფიცირებული. ახლა ჩვენ ვაკეთებთ PCR-ტექნოლოგიით ცხვირხახის ნაცხის ანალიზს, რომელიც არის ძალიან მაღალ სენსიტიური და სპეციფიკირუ, ანუ მისი სანდოობა არის ძალიან მაღალი. ამ შემთხვევაში უკვე დაიწყეს კომერციული ტესტების შეთავაზება სისხლის ანალიზის საშუალებით. იქვე მითითებული აქვს ამ სისხლის ანალიზის ტესტს, რომ უარყოფითი პასუხი არ გამორიცხავს ვირუსის არსებობას, რადგან ძალიან მაღალი უნდა იყოს უკვე კონცენტრაცია ვირუსის სისხლში. შორს წასულ შემთხვევებში ეს ტესტი გამოავლენს დაავადებას, მაგრამ თუ ეს არის ადრეული სტადია, განსხვავებით PCR-ისგან, სისხლის ტესტი ამას არ გამოავლენს და ესეც უნდა იყოს ცნობილი და კარგია, რომ ტესტი ამაზე აფრთხილებს მომხმარებელს“, - აღნიშნა მინისტრის მოადგილემ.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

რა უნდა ვიცოდეთ პანდემიის შესახებ, წაიკითხეთ აქ.