დეველოპერებისთვის დედაქალაქში მშენებლობისთვის აუცილებელი დოკუმენტების წარმოება გამარტივდება

დედაქალაქის მერია მშენებლობის წარმოებისთვის აუცილებელი დოკუმენტაციის გასამარტივებლად საკანონმდებლო ცვლილებების პაკეტზე მუშაობს, - ამის შესახებ დღეს თბილისის მთავრობის სხდომაზე დედაქალაქის მერმა კახა კალაძემ განაცხადა.

მისივე თქმით, მან გუნდს მისცა დავალება, რომ ქალაქმშენებლობითი დოკუმენტების მომზადების პროცესში გარკვეული სიმარტივე შეეტანათ. რაც ნაკლებად მნიშვნელოვანი ბიუროკრატიული რგოლებისა და პროცესების როგორც გაუქმებას, ასევე შემცირებას გულისხმობდა.

„ვიცე-მერს, ირაკლი ხმალაძეს დავავალე, ამ მიმართულებით გაგვემარტივებინა გარკვეული ნორმები. ის წესები და კანონები, რაც არსებობს ურბანული მიმართულებით, გარკვეულ პრობლემას წარმოადგენდა და ბევრ რამესთან წინააღმდეგობაში მოდიოდა. შესაბამისად, დროულად რომ მოხდარიყო დეველოპერების საამშენებლო პროექტების დამტკიცება. ზოგადად, განაშენიანების რეგულირების გეგმა ბევრი კომპონენტისგან შედგება. არის ბევრი ისეთი საკითხი, რომლის განხორციელება შესაძლებელი იყოს სხვაგვარად. მომზადებულია საკანონმდებლო ცვლილებების პაკეტი. მივმართავ ვიცე-მერს, ირკლი ხმალაძეს განმარტება გააკეთოს ამ ცვლილებებზე", - განაცხადა კახა კალაძემ სხდომაზე.

როგორც ხმალაძემ აღნიშნა, ქალაქგემარებითი დოკუმენტების მომზადება ძალიან დიდ დროს მოიცავს.

„ვცდილობთ, ნაკლებმნიშვნელოვანი ბიურიკრატიული რგოლები შეკვეცოთ. რა თქმა უნდა, არ შევეხოთ იმ მთავარ ღირებულებებს, რაც ყველასთვის მთავარია, მაგრამ ჩვენი მუშაობის ხარჯზე ბიზნეს-სექტორს ცოტა გავუმარტივოთ და შევამციროთ დროში მათი საინვესტიციო გადაწყვეტილებების მიღება, პროექტების განხორციელება. ახლა ჩვენ ვართ სამართლებრივი აქტების მომზადების პროცესში, რათა უახლოეს დრეებში დეველოპერებს გავუკეთოთ პრეზენტაცია. შევხვდეთ, მივაწოდოთ ეს მასალა, თუ რა ნაბიჯებს გადადგამს მუნიციპალიტეტი იმისთვის, რომ ქალაქგეგმარებითი დოკუმენტების მომზადების პროცესში გაჩნდეს გარკვეული სიმარტივები“, - განაცხდა ხმალაძემ.