ნანა კაკაბაძე: იუსტიციის სამინისტროს პროფესიონალიზმის წყალობით ჩვენს ქვეყანას უმძიმეს დანაშაულებში მხილებული პირი გადმოეცა

მიუხედავად იმისა, რომ არ მახასიათებს ხელისუფლების ქება არც ერთ დროსა და ეპოქაში, არ შემიძლია, მადლობა არ გადავუხადო იუსტიციის სამინისტროს, პირადად თეა წულუკიანს და იმ გუნდს, რომელმაც ამ საქმეზე იმუშავეს. სასიხარულოა, რომ ამ უწყებას სწორი კომუნიკაცია ჰქონდა და მათი პროფესიონალიზმის წყალობით უმძიმეს დანაშაულებში მხილებული პირი გადმოეცა საქართველოს, - ამის შესახებ ტელეკომპანია „იმედის“ გადაცემაში „დღის ქრონიკა“ უფლებადამცველმა, ნანა კაკაბაძემ განაცხადა, რითაც გერმანიიდან საქართველოში სასჯელაღსრულების დეპარტამენტის ყოფილი უფროსის, დავით ჭაკუას ექსტრადირებას გამოეხმაურა.

„მიუხედავად იმისა, რომ არ მახასიათებს ხელისუფლების ქება არც ერთ დროსა და ეპოქაში, არ შემიძლია, მადლობა არ გადავუხადო იუსტიციის სამინისტროს, პირადად თეა წულუკიანს და იმ გუნდს, რომელმაც ამ საქმეზე იმუშავეს. სასიხარულოა, რომ ამ უწყებას სწორი კომუნიკაცია ჰქონდა და მათი პროფესიონალიზმის წყალობით უმძიმეს დანაშაულებში მხილებული პირი გადმოეცა საქართველოს. ექსტრადირების მოთხოვნის სხვა არაერთ შემთხვევაში ამერიკელი სენატორები და ევროპარლამენტარები პირდაპირ მიუთითებდნენ იმაზე, რომ სხვა პრობლემებთან ერთად იყო კომუნიკაციის პრობლემაც, როდესაც ხელისუფლებამ ვერ დაანახა მეორე მხარეს, რომ ეს კრიმინალები არ იმსახურებდნენ ისეთ შეფასებებს, როგორც მათ წერილებში მოიხსენიებდნენ. სწორედ ასეთი არასწორი და არაადეკვატური დამოკიდებულება იწვევს ანტიდასავლურ განწყობებს“, - განაცხადა კაკაბაძემ.

მისივე თქმით, ჩვენ გვაქვს საქმე სისტემურ დანაშაულებთან და არა კონკრეტულ დანაშაულებთან, რომლებზეც კონკრეტულ პირებს უნდა ეგოთ პასუხი.

„მსოფლიოში არ არსებობს ხელისუფლება, სადაც კონკრეტული დანაშაულები არ ხდებოდეს, თუმცა იქ არც ერთი ნორმალური ადამიანი არ ითხოვს კონკრეტული დანაშაულების, კონკრეტული საჯარო მოხელის გადაცდომისა თუ მიზანმიმართულად კანონის დარღვევის სისტემურ დანაშაულად გამოცხადებას ან პოლიტიკური ჯგუფის გასამართლებას. ჩვენ გვქონდა სწორედ დანაშაულებთან საქმე, რომლებიც დასავლეთმა და დემოკრატიულმა სამყარომ შეაფასა როგორც დანაშაულები კაცობრიობის წინააღმდეგ. თქვენ იცით, რომ წამება და ღირსების შემლახავი მოპყრობა ის დანაშაულია, რომელიც ომის დროსაც კი დასჯადია. ეს დანაშაული ჩვენ ქვეყანაში 9 წლის განმავლობაში მივიღეთ როგორც პენიტენციური სისტემის მართვის ფორმა. დღეს დამიკავშირდა მალხაზ არქანიას ოჯახი და შემატყობინეს, რომ მათ სტრასბურგის სასამართლოში მიმდინარე შეტანილი საქმე მოიგეს. სასამართლომ მე-3 (წამება და ღირსების შემლახავი მოპყრობა​) და მე-5 მუხლების (პატიმრობის კანონიერების ეჭვქვეშ დადგომა) დარღვევა აღიარა. ზოგჯერ დღეში მომდის რამდენიმე მსგავსი შეტყობინება , რომ ამა თუ იმ საქმეზე ყოფილმა პატიმრებმა გაიმარჯვეს. გარდა იმისა, რომ 9 წლის განმავლობაში ადამიანებს სასტიკად ეპყრობობდნენ, სახელმწიფო უკვე არა ერთი წელია, იხდის ამ პოლიტიკური გუნდის მოღვაწეობის შედეგად ქვეყნისთვის მიყენებულ მატერიალურ ზიანს. პირველივე დღეებიდან ვითხოვდით, რომ ეს პოლიტიკური გუნდი როგორც რეჟიმი გასამართლებულიყო და თუნდაც 25 წლით ჩამოშორებულიყო პოლიტიკას და ყველა პირს, რომელსაც დანაშაული ჰქონდა ჩადენილი, ამისთვის პასუხი ეგო“, - აღნიშნა უფლებადამცველმა.

გერმანიამ წამებისთვის ძებნილი, სად-ის ყოფილი უფროსის ქართული მართლმსაჯულებისთვის გადმოცემის გადაწყვეტილება მიიღო.