თამთა მეგრელიშვილი: გიორგი შაქარაშვილის დედა ევედრება პოლიტიკურ ექსტაზში შესულ „ძალით ჭირისუფლებს", რომ საკუთარ ტკივილთან ის და მისი ოჯახი მარტო დატოვონ

შვილმკვდარი დედა ევედრება პოლიტიკურ ექსტაზში შესულ „ძალით ჭირისუფლებს“, რომ საკუთარ ტკივილთან ის და მისი ოჯახი მარტო დატოვონ,- ასე ეხმიანება იურისტი თამთა მეგრელიშვილი გიორგი შაქარაშვილის დედის ემოციურ მიმართვას რამდენიმე მედიასაშუალებისადმი.

მისი თქმით, გიორგის სტკივა მისი გამწარებული დედისა და მამის ტკივილი, რომელსაც ყოველდღიურად აყენებენ არაადამიანური სიუჟეტებით.

,,შვილმკვდარი დედის ტკივილს ალბათ ქვეყნად ვერანაირი ტკივილი შეედრება. მახსოვს ერთხელ ქუჩაში ხელგამოწვდილ მოხუცს გავესაუბრე და შუა საუბარში მითხრა: "შვილი მომიკლეს. ისე მძიმედ განვიცდი,რომ ვერც ვგრძნობ რომ ვცოცხლობო... “ ის ტკივილი, რაც მაშინ სხეულში ვიგრძენი, სიტყვებით არ გადმოიცემა. იმის შემდეგ შავებით შემოსილი შვილმკვდარი დედების დანახვისას, თავს ვხრი, მათ თვალებში, ჩახედვის მეშინია.დღეს სოციალურ ქსელში გიორგი შაქარაშვილის დედის თხოვნა წავიკითხე. ქალი, შვილმკვდარი დედა ევედრება პოლიტიკურ ექსტაზში შესულ "ძალით ჭირისუფლებს," რომ საკუთარ ტკივილთან ის და მისი ოჯახი მარტო დატოვონ. "ვითომ მირიან ნიკოლაძეზე დიდი გულშემატკივრები რომ ხართ ჩვენი ოჯახის, ვის ედრებით. ადამიანს, რომელიც ჩემი მეუღლის ოჯახშია გაზრდილი და რომლის ხელშიც გიორგი გაიზარდა?! რომელთან ურთიერთობაც გიორგისთვის ყველაზე საამაყო და სათუთი იყო, იმ კაცს ედრებით?! რა სიბინძურე არ დააბრალეთ, რა ცილისწამება აღარ შეთხზეთ, რა აღარ აკადრეთ, მხოლოდ იმის გამო, რომ თქვენი ბინძური პოლიტიკური ინტერესების საჯიჯგნი არ გამიხადა მოკლული შვილი" "რას გვერჩით, რას გვემართლებით, რატომ არ გვაცდით ჩვენი ანგელოზი შვილის დატირებას!"გრცხვენოდეთ. გტკივათ გიორგი?! გიორგისაც სტკივა მისი გამწარებული დედისა და მამის ტკივილი, რომელსაც ყოველდღიურად აყენებთ თქვენი არაადამიანური სიუჟეტებით. მე რითი შემიძლია ამ ოჯახის დაცვა, არ ვიცი! მაგრამ ჩემ წილ ბოდიშს ვუხდი ოჯახს იმ სიბოროტის გამო რომელსაც დღეს ჩვენი საზოგადოების წევრები - კონკრეტული ჟურნალისტები ჩადიან.

დღეს გარდაცვლილი 19 წლის ფეხბურთელის გიორგი შაქარაშვილის დედამ თამუნა შალვაშვილმა სოციალურ ქსელში მიმართვა გაავრცელა.

10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით. ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.

28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.

19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.