მიხეილ ყაველაშვილი: ასეთი ტრაგედიის დროს ეს ადამიანები თავს უფლებას აძლევენ, გარდაცვლილის ოჯახის წევრებს შეურაცხყოფა მიაყენონ

ჩემს წილ პასუხისმგებლობასაც ვგრძნობ იმის გამო, რომ საზოგადოებაში არსებობს ძალა, რომელიც ამ უმძიმეს მდგომარეობაში მყოფ ოჯახს ასე ექცევა. ყველაფერს გავაკეთებ, რომ ასეთი ადამიანები, რომლებიც ყველა ტრაგედიის თავისი ვიწრო პარტიული ინტერესებისთვის გამოყენებას ცდილობენ, ამ ოჯახს ასე ვეღარ მოექცნენ, - ამის შესახებ საპარლამენტო უმრავლესობის წევრმა, სპორტისა და ახალგაზრდულ საქმეთა კომიტეტის თავმჯდომარემ, მიხეილ ყაველაშვილმა განაცხადა, რითაც გარდაცვლილი 19 წლის ფეხბურთელის, გიორგი შაქარაშვილის დედის, თამუნა შალვაშვილის მიერ სოციალურ ქსელში გავრცელებულ მიმართვას გამოეხმაურა.

„როდესაც ოჯახში ასეთი ტრაგედია ხდება, მთელი საქართველო განიცდის ამ ბიჭის გარდაცვალებას და ასეთ დროს ეს ადამიანები თავს უფლებას აძლევენ, გარდაცვლილის ოჯახის წევრებს ასე მიმართონ და შეურაცხყოფა მიაყენონ. მათ სურთ დაანახონ საზოგადოებას, თითქოს ოჯახის წევრებზე მეტად განიცდიან ამ ამბავს. რა შეიძლება ითქვას, როცა ამ მდგომარეობაში მყოფი მშობელი ვეღარ ითმენს და ამბობს, რომ თავი დაანებონ და მორჩნენ სპეკულირებას ამ თემაზე. თუ რაღაც შვება იქნება, შემიძლია ყველას ნაცვლად ბოდიში მოვუხადო ამ ოჯახს. ჩემს წილ პასუხისმგებლობასაც ვგრძნობ იმის გამო, რომ საზოგადოებაში არსებობს ძალა, რომელიც ამ უმძიმეს მდგომარეობაში მყოფ ოჯახს ასე ექცევა. ყველაფერს გავაკეთებ, რომ ასეთი ადამიანები, რომლებიც ყველა ტრაგედიის თავიანთი ვიწრო პარტიული ინტერესებისთვის გამოყენებას ცდილობენ, ამ ოჯახს ასე ვეღარ მოექცნენ. საზოგადოებამ უნდა დაინახოს, რომ შეუძლებელია ამ ძალასთან ნორმალური ურთიერთობა. 9-წლიანი რეჟიმის დროსაც იყვნენ ადამიანები, რომლებიც ვერ ხედავდნენ იმ ყველაფერს, სანამ თითოეულ ოჯახში არ შევიდა ის ძალადობა. ციხეებში არსებულ მდგომარეობაზე ყველა საუბრობდა, მაგრამ მხოლოდ ტელევიზიით ვიდეოს გავრცელების შემდეგ აჯანყდა საზოგადოება და სისტემის ჩამონგრევა მოითხოვა. წარმოიდგინეთ დედა, რომელსაც 19 წლის შვილი გარდაცვლილი ჰყავს, ამდენი ხანი ითმენდა, ან როგორ მიმართავენ ეს ადამიანები გიორგის ბიძას, რომლის ხელშიც გაიზარდა ეს ბიჭი, მხოლოდ იმიტომ, რომ არ დაუშვა, მათი სპეკულირების საგანი გამხდარიყო ეს თემა. საზოგადოებამ ერთხელ და სამუდამოდ უნდა გასცეს ამას პასუხი“, - განაცხადა ყაველაშვილმა.

გარდაცვლილი 19 წლის ფეხბურთელის, გიორგი შაქარაშვილის დედამ, თამუნა შალვაშვილმა სოციალურ ქსელში მიმართვა გაავრცელა.

10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით. ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.

28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.

19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.