კლერ ოლბლესი შატილის გზაზე მომხდარი შემთხვევისას დაღუპულთა ახლობლებს უსამძიმრებს

გაერთიანებული სამეფოს ელჩის მოვალეობის შემსრულებელი, კლერ ოლბლესი შატილის გზაზე მომხდარი ავარიისას დაღუპულთა ახლობლებს უსამძიმრებს.

„ღრმად ვართ დამწუხრებულნი შატილის გზაზე მომხდარი ტრაგიკული შემთხვევის გამო, რომელსაც 17 ადამიანის სოცოცხლე ემსხვერპლა. ვუსამძიმრებთ ყველას, ვინც ახლობელი ადამიანი დაკარგა. დაშავებულებს მალე გამოჯანმრთელებას ვუსურვებთ“, - წერს ოლბლესი Twitter-ის საკუთარ გვერდზე.

Deeply saddened to hear of yesterday’s tragic accident on the Shatili road that has taken the lives of 17 people. We send our condolences to all who have lost loved ones, and wish those injured an early recovery

— Clare Allbless (@ClareAllbless) August 24, 2020

შატილის გზაზე ავარიის შედეგად 17 ადამიანი გარდაიცვალა, სამის მდგომარეობა კი უკიდურესად მძიმეა.

ტრაგედიისას დაღუპულთა ხსოვნის პატივსაცემად, 25 აგვისტო საქართველოში გლოვის დღედ გამოცხადდა. შესაბამის განკარგულებას პრემიერ-მინისტრმა, გიორგი გახარიამ ხელი დღეს მოაწერა. განკარგულების თანახმად, გლოვის დღესთან დაკავშირებით, საქართველოს მთელ ტერიტორიაზე, ყველა ადმინისტრაციულ შენობაზე სახელმწიფო დროშა დაეშვება.

ამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.

სამაშველო სამუშაოები შინაგან საქმეთა მინისტრის მოადგილისა და საგანგებო სიტუაციების მართვის სამსახურის უფროსის უშუალო ხელმძღვანელობით განხორციელდა.