დიასპორისა და კავკასიის საკითხთა კომიტეტმა ჩერქეზული კულტურის ცენტრის დირექტორს, მერაბ ჩუხუას მოუსმინა

დიასპორისა და კავკასიის საკითხთა კომიტეტის წევრებს სსიპ ჩერქეზული (ადიღეური) კულტურის ცენტრის დირექტორმა, პროფესორმა მერაბ ჩუხუამ, ცენტრის საქმიანობაზე, კავკასიელი ხალხების დიასპორულ და სხვა არასამთავრობო ორგანიზაციებთან არსებული კავშირებისა და თანამშრომლობის გაღრმავებისა თაობაზე მიაწოდა ინფორმაცია.

მერაბ ჩუხუამ, დამსწრე საზოგადოებას შეახსენა ცენტრის საქმიანობის ძირითადი მიმართულებები: ჩერქეზი ერის ისტორიისა და კულტურის კვლევა-პოპულარიზაცია, ჩრდილოკავკასიის ხალხთა და თვითმყოფად კულტურათა შორის დიალოგის წარმოება; საქართველოს ინტელექტუალური რესურსის გააქტიურება, მეცნიერებისა და კულტურის თვალსაჩინო წარმომადგენლების, ასევე უცხოეთში არსებული კავკასიოლოგიური ცენტრების გაერთიანება კავკასიის რეგიონში შედეგებზე ორიენტირებული თანამშრომლობის მისაღწევად.

მომხსენებლის თქმით, თანამედროვე საქართველოს ჩრდილოკავკასიური მიმართულება ქვეყნის სამეცნიერო-კულტურული პოლიტიკის ერთიან და განუყოფელ ნაწილს წარმოადგენს. ამ მხრივ თანამიმდევრული, მწყობრი ნაბიჯების გადადგმა ხელს შეუწყობს საქართველოს რეგიონული მასშტაბის ანგარიშგასაწევ ძალად (Regional Power) ფორმირებას და საზოგადოდ სახელმწიფოებრივი პოზიციების განმტკიცებას.

საქართველოსა და ჩრდილოკავკასიელ ხალხებს აერთიანებთ ენობრივი და გენეტიკური ნათესაობა, კულტურულ-ტრადიციული ერთობა და ორმხრივი კონტაქტების მრავალსაუკუნოვანი ისტორია. აქედან გამომდინარე, ჩრდილო კავკასიის ხალხებთან ურთიერთობაში, დიდი მნიშვნელობა ენიჭება რეგიონის პრობლემატიკაში გარკვევას, რაც გულისხმობს თითოეული კავკასიელი ხალხის ენის, ისტორიისა და კულტურის კვალიფიციურ ცოდნას. ამჟამად, საქართველოში მოქმედებენ ჩრდილოკავკასიასთან დაკავშირებული შემდეგი დაწესებულებები: სსიპ ჩერქეზული (ადიღეური) კულტურის ცენტრი ხელმძღვანელი პროფ. მერაბ ჩუხუა), ივანე ჯავახიშვილის სახელობის თბილისის სახელმწიფო უნივერსიტეტის კავკასიოლოგიის ინსტიტუტი (დირექტორი პროფ. ცირა ბარამიძე), ილიას უნივერსიტეტთან არსებული კავკასიური კვლევის საერთაშორისო სკოლა, გარდა ამისა საქართველოში მოღვაწეობს არა ერთი, არასამთავრობო ორგანიზაცია და საინიციატივო ჯგუფი, რომელიც ორიენტირებულია ჩრდილო კავკასიაზე (კავკასიის კვლევის ცენტრი, „პრომეთე“ და სხვ.)

მერაბ ჩუხუას მოსაზრებით, ჩრდილო კავკასიელ ხალხთა შორის, განსაკუთრებულად პრიორიტეტულია ჩერქეზებთან ურთიერთობა. უკვე რამდენიმე წელია ჩერქეზული კულტურის ცენტრი, აქტიურად თანამშრომლობს ჩერქეზულ საზოგადოებასთან. ამგვარმა ურთიერთობებმა რეალური შედეგიც გამოიღო. დღეს, როგორც ჩერქეზულ რესპუბლიკებში, ისე აშშ-ში, გერმანიასა და ახლო აღმოსავლეთის ქვეყნებში მოღვაწეობენ საქართველოსადმი პოზიტიურად განწყობილი ორგანიზაციები: „ადიღე ჰასე“ (ჩერქეზეთი), „საერთაშორისო ჩერქეზული საბჭო“ (აშშ), „რადიო ადიღე“ (ისრაელი),“ჩერქეზეთის პატრიოტები“ (თურქეთი) და სხვ. გასათვალისწინებელია ის ფაქტორი, რომ სახალხო დიპლომატიის ფარგლებში ჩერქეზებს აქვთ რეალური შესაძლებლობა უშუალო კონტაქტი დაამყარონ აფხაზურ სამოქალაქო სექტორთან, აფხაზურ დიასპორასთან და შუამავლის როლი ითამაშონ მათ ქართველ კოლეგებთან.

მერაბ ჩუხუას თქმით, ქართულ-კავკასიური დიალოგის ფარგლებში კიდევ უფრო ნაყოფიერი შეიძლება გახდეს, ჩეჩნური, დაღესტნური, ინგუშური და ყარაჩა-ბალყარული მიმართულების გაძლიერება კულტურულ-სამეცნიერო ურთიერთობის გაღრმავებით.

სხდომის წამყვანმა, დიასპორისა და კავკასიის საკითხთა კომიტეტის თავმჯდომარემ, ბექა ოდიშარიამ მომხსენებელს მადლობა გადაუხადა საინტერესო გამოსვლისათვის და ხაზი გაუსვა ჩრდილოკავკასიელ ხალხებთან მრავალმხრივი ურთიერთობის განვითარების აუცილებლობას, რაშიც განსაკუთრებული როლი ენიჭება ჩერქეზული კულტური ცენტრს, რომელსაც ამგვარი საქმიანობის დიდი გამოცდილება დაუგროვდა და რომელთან თანამშრომლობას კომიტეტი მომავალშიც ინტენსიურად გააგრძელებს.

კავკასიის საკითხებზე მომუშავე დარგის სპეციალისტებისა და არასამთავრობო ორგანიზაციების საქმიანობა მნიშვნელოვანია სახალხო დიპლომატიის წარმოების მიმართულებითაც, რაც გვესახება კონფლიქტის რეგიონში მცხოვრებ მოსახლეობასთან კონტაქტის დამყარებაში - აღინიშნა კომიტეტის სხდომაზე.