ანა ჯაბაურმა განმარტა როგორია ცოტნე გამსახურდიას ჯანმრთელობის მდგომარეობა

„​იმედის კვირა“ საქართველოს პირველი პრეზიდენტის შვილის, ცოტნე გამსახურდიას ჯანმრთელობის მდგომარეობის გასაგებად და ოჯახის მხარდასაჭერად გერმანიაში, ქალაქ უნაში ჩავიდა. ეს მესამე კლინიკაა უცხოეთში, სადაც გამსახურდია მოათავსეს.

უმაღლესი დონის სპეციალისტები მის მდგომარეობაზე მორგებულ რეაბილიტაციის სპეციალურ კურსს მიჰყვებიან. უცხოეთში მკურნალობას და რეაბილიტაციას პირველივე დღიდან სრულად „ფონდი ქართუ“ აფინანსებს და მზადაა ფინანსური მხარდაჭერა გააგრძელოს ცოტნეს სრულად გამოჯანმრთელებამდე. გამსახურდიას ჯანმრთელობის მდგომარეობის შესახებ მისი მეუღლე, ანა ჯაბაური საუბრობს.

„დღეს ცოტნე სუნთქავს დახმარების გარეშე. ესმის ყველაფერი. ხუმრობაზე იცინის. ფილმებს ერთად ვუყურებთ. ამბობს რამდენიმე სიტყვას. ნათქვამი აქვს რამდენიმე წინადადება. ემოციებს ისე მძაფრად არ გამოხატავდა. როცა ცოტნეს სურვილის გაგება მინდოდა ხელი უნდა მოეჭირა. დღეს ეს არ გვჭირდება, რადგან დიახ-ს და არა-ს მაგებინებს. ცოტნე კი-ს და არა-ს სიტყვითაც მეუბნება. ჩემი თხოვნით და მეცადინეობით ცოტნემ თქვა მამა. ეს იყო მისი პირველი სიტყვა. ფიზიოთერაპევტმა ათქმევინა ანა. თურქეთში ექიმები ამბობდნენ, რომ მისი გადარჩენის შანსი 10%-ზე ნაკლები იყო. კომაში მყოფს დაემართა მენინგიტი“, - ამბობს ჯაბაური.

მისი თქმით, ასეთ მდგომარეობაში გამსახურდია თურქეთში გადაიყვანეს, ახლა კი 2 კვირის განმავლობში ის გერმანიაში, უნაში, ზაზა ქაცარავასთან მკურნალობს.

„მან გაგვიწია უპრეცედენტო მასპინძლობა. ზაზა ქაცარავამ თავის ჰონორარზე უარი თქვა. მან თქვა, რომ ამ ოჯახიდან თანხას მე ვერ ავიღებო და თან იცოდა, რომ ცოტნეს მკურნალობასა და რეაბილიტაციასთან დაკავშირებულ ხარჯებს ფარავს „ფონდი ქართუ“. ცოტნე ძალიან შეღავათიან ფასებში იმყოფება აქ და ეს ზაზას სურვილით, რადგან „ფონდი ქართუ“ ყველაფერზე თანახმა იყო, რაც საჭირო იქნებოდა“, - განაცხადა ჯაბაურმა.

ცოტნე გამსახურდია 2019 წლის 19 დეკემბერს საკუთარ სახლთან დაჭრეს. მას თავდაპირველად, ხეჩინაშვილის კლინიკაში მკურნალობდნენ, შემდეგ კი თურქეთის კლინიკაში გადაიყვანეს, სადაც ის ივლისამდე მკურნალობდა. ამჟამად ის მკურნალობის კურსს გერმანიაში გადის.