ბექა დავითულიანი: ჩვენ გვაქვს წარმოდგენა როგორ შეიძლება განვითარდეს ეს ქალაქი და კოლაფსი არ მოგვივა

ურბანული პოლიტიკაა ის ჩარჩო, რომელსაც ქალაქის სხვა ნებისმიერი პოლიტიკა ეფუძნება, - ამის შესახებ „იმედის ფაქტორში“ ბექა დავითულიანმა განაცხადა. „ქართული ოცნების“ დეპუტატისა და საკრებულოს ყოფილი წევრის თქმით, მთავარ პრობლემას ამ თვალსაზრისით თბილისის ქაოსური განაშენიანება წარმოადგენდა.

„ჩვენ დიდწილად ქაოსი გვქონდა, ქალაქს რა მოუვიდოდა წლების მერე ზუსტად არ ვიცოდით. ამიტომ დავსხედით გენგეგმის ჯგუფთან ერთად მათ შორის და წარმოვიდგინეთ, ქალაქს რა უნდა მოუვიდეს, მივიღეთ ეს დოკუმენტად და როგორ განვითარდება და როგორი იქნება ეს ქალაქი წლების მერე, ამის ჩარჩო შევადგინეთ“, - განაცხადა დავითულიანმა.

მისივე თქმით, ამის შემდეგ კოეფიციენტების გადამეტება აიკრძალა, რაც ურთულესი გადაწყვეტილება იყო.

„წესები დავაწესეთ საერთოდ ყველასთვის და სამშენებლო ბიზნესი მერე უკვე გამოგვყვა. რომ ნახეს, რომ ჩვენივე თავებს ჩავუკეტეთ ამის დაშვების უფლება, რომ მერე ვინმეზე გამონაკლისი არ გაკეთებულიყო. სამშენებლო სექტორმა მერე ეს პირდაპირ თქვა: „თუ თქვენ ამ თამაშის წესში გამონაკლისს არ გააკეთებთ, მაშინ ეს ჩვენთვის მისაღებია, იმიტომ რომ ბიზნესი კონკურენციაში დარჩება“. ეს გავაკეთეთ, ვნახეთ, რომ სამშენებლო სექტორს ამით არაფერი დაემუქრა. გავამკაცრეთ მთელი რიგი რეგულაცია. დღეს შენობას ვერ ააშენებ, როგორც ადრე, თუ არ არის სატრანსპორტო კვლევა, თუ არ გააკეთე დენდროლოგიური პროექტი და ა.შ. ეს ყველაფერი დასტაბილურდა. შედეგად ჩვენ გვაქვს წარმოდგენა როგორ შეიძლება განვითარდეს ეს ქალაქი მომავალ წლებში და კოლაფსი აღარ მოგვივა, რაც ძალიან მნიშვნელოვანია“, - განაცხადა დავითულიანმა.